Lideri i Aleancës Kosova e Re (AKR), Behgjet Pacolli, sot në hapje të fushatës në Malishevë, ftoi qytetarët e kësaj komune t’ia besojnë votën kandidatit të tyre, Alban Kastrati, nëse duan të mos përballen me problemet e deritashme.

“Mos u besoni njerëzve të cilët ju premtuan, por besoni realitetit dhe fakteve. Këta njerëz prapë vijnë dhe kërkojnë votën e tuaj, është e drejtë që t’i tregojnë faktet se çka kanë bërë në jetën e tyre dhe në çka bazohet premtimi i tyre. Më 15 nëntor, ju duhet t’i ndëshkoni ata, të dilni në votime dhe ta zgjidhni me të mirin”, ka thënë Pacolli, në tubimin, ku u prezantua kandidati për kryetar dhe ata për këshilltarë komunalë.

Pacolli u tha malishevasve që ta bëjnë zgjedhjen e duhur. “Ka ardhur koha e punës dhe jo e premtimeve, e punës dinjitoze, përgjegjësisë e llogaridhënies”.

Sipas një njoftimi të AKR-së, Pacolli ka thënë në Malishevë se shtetet të cilat ia zgjatën dorën Kosovës dhe e njohën, tani kërkojnë që të punohet. Sipas tij, tani ka ardhur koha e fazës së tretë të shtetndërtimit të Kosovës, që është faza e zhvillimit ekonomik.

“Tash nuk ka vend për fjalë, demagogji, por ka ardhur koha kur duhet t’i qesim faktet në tavolinë, edhe kësaj ane po vinë njerëz të cilët po u premtojnë miliona, vende të punës, por po e shihni këto dy vite nuk ndodhi asgjë në rrafshin e qytetarit në krahasim me premtimet që i bënë”, ka theksuar lideri i AKR-së.