Deputeti i Partisë Demokratike, Gazmend Oketa, tha gjatë një interviste në “Ora News” se disa figura të rëndësishme duhet të ishin pjesë e listës së kandidatëve të PD-së në zgjedhjet e 28 qershorit. Ndonëse nuk përmendi emra konkretë, ai tha se “nuk mund të them se kush e meritonte ose jo të ishte, por mund të them se lista përfaqësoi të gjitha kategoritë e mbështetësve”. Në prag të hartimit të listave për zgjedhjet e përgjithshme ngelën jashtë garës figura kryesore si ish-kryetari i komisionit të Jashtëm, Preç Zogaj, ish-deputeti dhe anëtari i kryesisë së PD-së, Aleksandër Biberaj, ish-ministri i Kulturës, Bujar Leskaj apo edhe ish-ministri i Jashtëm, Besnik Mustafaj. Jashtë listave, apo në pozicione jo fituese, u renditën edhe disa prej deputetëve të cilët mbështetën publikisht kandidimin e Bamir Topit për President, si dhe kundërshtuan disa prej ndryshimeve kushtetuese të 21 prillit. Në pozicionin e ish-ministrit të Mbrojtjes, Gazmend Oketa mbrojti marrëveshjen mes Shqipërisë dhe Greqisë për ndarjen e kufirit detar. Sipas tij, kjo marrëveshje është një domosdoshmëri politike për sigurinë kombëtare. Oketa theksoi se parimisht nuk ka asnjë politikan që të ketë kundërshtuar një marrëveshje, e cila përcakton një kufi që nuk ka ekzistuar më parë. “Personalisht nuk kam asnjë ndjenjë dyshimi për marrëveshjen dhe negociatorët kanë bërë çdo gjë të mundur për paktin”, tha Oketa.