Trajneri i Kombëtares shqiptare, Josip Kuze ka qëndruar në Shqipëri, ku ka përcjellë nga afër dy ndeshje të kampionatit shqiptar. Kroati të shtunën ka përcjellë ndeshjen Tirana – Kastrioti, derisa të dielën ka parë takimin ndërmjet Skënderbeut dhe Apolonisë.

Qëllimi i kroatit ishte që të vëzhgojë nga afër disa futbollistë, që në të ardhmen do të mund të bartnin fanellën e ekipit kuqezi. Mirëpo ish-trajneri i Dinamo Zagrebit tha se e ka të vështirë të gjejë lojtarë në Shqipëri, sidomos në repartin e mbrojtjes.

“Përveç Franc Veliut, nuk kam parë asnjë lojtar tjetër që të më tërheqë me lojën që shpalosin në fushë”, ka thënë Kuze për mediat shqiptare.

Kuze ditë më parë publikoi listën e lojtarëve të ftuar për ndeshjen e 14 tetorit kundër Suedisë, e cila është edhe takimi i fundit i eliminatoreve për botërorin Afrika e Jugut 2010.

Për këtë përballje, Kuze në ekipin kuqezi ka rikthyer mesfushorin e APOEL, Altin Haxhi, i cili që nga nëntori i viti 2007 nuk ka veshur fanellën e Shqipërisë. Ndërsa Kuze, si duket, nuk do të mund të llogaritë në shërbimet e Elis Bakajt, i cili ka pësuar një lëndim.

“Më vjen keq për Bakajn, doja ta shihja. Gjithsesi ai është pjesë e Kombëtares”, theksoi kroati, i cili ka sjellë një frymë të re në ekipin kuqezi që pas emërimit të tij në krye të Kombëtares.

Për ndeshjen me Suedinë, grumbullimi i Kombëtares do të bëhet në Gjermani, më 5 tetor. Ndërsa dy ditë më vonë, kuqezinjtë do të luajnë një ndeshje miqësore me klubin nga Bundesliga 2, Greuther Fürth. Ndërsa Shqipëria do të zhvillojë edhe një ndeshje miqësore me Estoninë, më 14 nëntor, në Talin.