Trajneri i Vëllaznimit, Blerim Mula të dielën pasdite ka dhënë dorëheqje të parevokueshme nga ky post. Këtë vendin Mula e ka marrë menjëherë pas humbjes së kuqezinjve në shtëpi nga Ferizaj, me rezultat 0:1.

Kjo ishte humbja e dytë rresht që Vëllaznimi e pësoi para adhuruesve të vet, ngase para dy jave ata u mposhtën edhe nga Liria në Gjakovë (0:1). Dhe pikërisht rezultatet e dobëta e kanë shtyrë Mulën që t’i thotë lamtumirë Vëllaznimit.

“Vëllaznimi nuk e meriton t’i pësojë dy humbje rresht në shtëpi. Dikush duhet larguar me këtë rast, atëherë vendosa që të largohem unë. Dhashë dorëheqje të parevokueshme, sepse edhe më parë kam ofruar dorëheqje, por Kryesia nuk e pati aprovuar”, deklaroi Mula për Express të dielën.

Kuqezinjtë këtë sezon po zhgënjejnë me rezultate. Pas dhjetë xhirove, gjakovarët i kanë shënuar tri fitore dhe i kanë pësuar gjashtë disfata, kurse një herë kanë luajtur baras. Sipas Mulës, Vëllaznimi nuk mund të bëjë më shumë se kaq.

“Klubi i ka kryer të gjitha obligimet me rregull ndaj futbollistëve dhe ndaj meje. Por, nuk kam qenë i kënaqur me kualitetin e lojtarëve. Unë i kam fajet që dikur pranova ta udhëheq këtë ekip me këtë fond të lojtarëve. Pata pranuar ta udhëheq Vëllaznimin vetëm për një arsye: sepse është klub i madh. Futbollistët kanë dhënë maksimumin nga vetja e tyre, por kanë pasur ngarkesa. Ekipit i mungojnë lojtarët me përvojë për ta bartur barrën kryesore”, përfundoi Mula.

Mula është trajneri i pestë që mbetet i papunë pas Gani Sejdiut, Besnik Kollarit, Muharrem Sahitit dhe Xhafer Dobrës.