E marta ishte ditë historike për Romën. Në qendrën sportive Trigoria, presidentja e klubit, Rosella Sensi, e ka prezantuar projektin për stadiumin e ri. Pas një klipi të shkurtër e ka marrë fjalën presidentja Giallorosso.

“Babai im Franco Sensi e Dino Viola e kishin ndërmend dhe në program të tyre ta ndërtonin një stadium. Kjo dëshirë e tyre po bëhet realitet. Distanca nga tribunat në fushë janë reduktuar në masë të madhe. Kapaciteti do të jetë 55 mijë vende, por që mund të arrijë deri në 60 mijë”, u shpreh Sensi.

Stadiumi do të ndërtohet në kilometrin e nëntë tek Aurelia, ndërsa do të emërohet Franco Sensi, në emër të presidentit historik të klubit romak. “Kemi nevojë për një stadium që mund të shfrytëzohet para dhe pas ndeshjeve me një siguri totale. Klubet italiane janë të hendikepuara sepse luajnë në stadiume me infrastrukturë jo dhe aq të mirë. Në shtetet tjera është situata ndryshe”, vazhdoi Sensi.

Aktualisht Roma i zhvillon ndeshjet si vendëse në stadiumin Olimpico të qytetit të Romës, së bashku me rivalin lokal Lazio.