TIRANË- Komisioni i Zgjedhjeve i Partisë Socialiste të Shqipërisë ka
dhënë pak më parë rezultatet paraprake të administruara në mënyrë
operative nga 37 Komisionet Rajonale, që rikonfirmojnë Edi Ramën në
krye të kësaj force politike edhe për 4 vitet e ardhshme.

Sipas të dhënave të këtij komisioni, informacioni paraprak jo zyrtar
rezulton se në zgjedhje morën pjesë rreth 56.000 anëtarë të PSSH së. I
shprehur në përqindje pjesëmarrja e anëtarëve të PSSH-së rezulton se në
këto zgjedhje ishte mbi 65 %.

"Për kandidatin Edi Rama kanë votuar rreth 51.000 anëtarë ose rreth
93% e anëtarëve pjesëmarrës në votim, ndërsa për kandidatin Maqo
Lakrori kanë votuar rreth 3700 anëtarë ose rreth 6.7 % e pjesëmarrësve
në këtë proces"- thuhet në deklaratën që ka nxjerrë Komisioni i
Zgjedhjeve në PS.

Deri në mesditë janë administruar procesverbalet dhe dokumentacioni
zgjedhor të 20 komisioneve zgjedhore rajonale, materiale të cilat janë
duke u administruar konform rregullave të Kodit Zgjedhor nga ky
Komision. KZP është në pritje të dokumentacionit edhe të 17 rretheve
për shkak të largësisë.

Nga të gjitha vëzhgimet dhe informacionet e ardhura pranë Komisionit
të Zgjedhjeve të Partisë, është konstatuar se procesi është zhvilluar
në normalitet të plotë dhe tërësisht në përputhje me rregullat e
përcaktuara në Kodin e Zgjedhjeve të PSSH-së.