Kryeministri i Spanjës, Jose Luis Rodriguez Zapatero, ka ritheksuar qëndrimin e vendit të tij për mos njohjen e pavarësisë së Kosovës.

“Nuk është korrekte të njihet Kosova, pasi që kjo është në kundërshtim me të drejtën ndërkombëtare”, ka thënë të mërkurën mbrëma në New York, kryeministri spanjoll, duke iu përgjigjur interesimit të mediave nëse Madridi zyrtar do të ndryshojë qëndrimin në lidhje me njohjen e Kosovës.

Ai ka thënë se Spanja nuk do të ndryshojë qëndrimin e saj edhe kur të jetë kryesuese e radhës e Presidencës së Bashkimit Evropian, nga 1 janari i vitit të ardhshëm.

Duke shpjeguar qëndrimin kundër njohjes së Kosovës, Zapatero ka thënë se Spanja ka politika strikte sa i përket krijimit të shteteve të reja dhe njohjen e tyre.

Spanja është njëra nga pesë vendet anëtare të BE-së që nuk ka njohur Kosovën. Ky vend tashmë ka tërhequr edhe trupat e saja në kuadër të KFOR-it, pas dhjetë vjet shërbimi në Kosovë, për shkak se Madridi zyrtar nuk e ka njohur shtetin e Kosovës.