Zv/ministri i FSK-së, Behxhet Brajshori është duke qëndruar në Mbretërinë e Bashkuar në konferencën treditore, në Qendrën e Konferencave Ëilton Park në Londër, të titulluar: “Ngritja e kapaciteteve lokale për siguri dhe sundimin e ligjit në shtetet e brishta dhe të prekura nga konfliktet”.

Konferenca ku është duke marrë pjesë zv/ministri Brajshori, është përcaktuar nga gjendja ku komuniteti ndërkombëtar ka qenë i përfshirë në përpjekje të vazhdueshme për të forcuar dispozitën e sigurisë dhe drejtësisë në zhvillimin e shteteve me gjendje të brishtë dhe të prekura nga konfliktet, thuhet në një komunikatë të Zyrës për informim të MFSK-së.

Konferenca ka për qellim që të shqyrtojë fushat teorike: mbi metodologjinë, terminologjinë dhe objektivat e parashtruara në siguri dhe sundim të ligjit.

Konferenca është e organizuar në bashkëpunim me; Libra Advisory Group Ltd, me përkrahjen nga Qendra për Marrëdhënie Civilo-Ushtarake dhe Zyra e sekretarit të Mbrojtjes për Politikë, Departamenti i Mbrojtjes i SHBA-ve, zyrat federale dhe të jashtme, Departamenti i Punëve të Jashtme dhe Tregtia Ndërkombëtare e Kanadasë.

Pjesëmarrës në konferencë janë: ministra, zv ministra, ambasadorë, zyrtarë të lartë të mbrojtjes, drejtorë departamentesh, ambasadorë dhe ekspertë të sigurisë dhe jurisprudencës nga shtete të ndryshme.