Kryeministri i Kosovës Hashim Thaçi ritheksoi sot se institucionet e Kosovës nuk janë pjesë e aranzhimeve teknike ndërmjet EULEX-it dhe Serbisë. Policia e Kosovës po ashtu thotë se nuk është pjesë e marrëveshjes, por shprehet e hapur për bashkëpunim me policitë e vendeve të rajonit. Analistët ndërkaq, vlerësojnë se shkëmbimi i informacioneve, që parashihet me dokument, është realisht i pa mundur pa policinë e Kosovës.


"Ritheksoj se institucionet e Kosovës nuk janë pjesë e ndonjë pretendimi të ndonjë aranzhmani teknik, por institucionet e Republikës së Kosovës, qeveria e Kosovës do të vazhdojë përpjekjen për luftën pa kompromis ndaj dukurive negative, korrupsionit apo krimit të organizuar edhe në nivel të Kosovës, edhe në nivel rajonal dhe në bashkëpunim shumë të ngushtë me autoritetet e Brukselit dhe SHBA-të", tha Thaçi.


Protokolli i paralajmëruar ka të bëjë me bashkëpunimin ndërmjet EULEX-it dhe policisë së Serbisë. Por, ai parasheh shkëmbimin e informacioneve në këtë lëmi, që lidh në këtë proces edhe policinë e Kosovës. Zëdhënësi i Policisë së Kosovës, Arbër Beka ka thënë sot se policia e Kosovës nuk është pjesë e kësaj marrëveshje, por Beka pohoi se policia e Kosovës është e hapur dhe ka raporte bashkëpunim me policitë e vendeve tjera të rajonit.


"Ne kemi cekë disa herë se kemi një bashkëpunim të mirë me policitë e vendeve të rajonit. Bashkëpunimi me të gjitha vendet e rajonit është më se i nevojshëm kur flitet për luftimin e krimit të organizuar dhe gjitha format tjera të krimit," tha Beka.


Mirëpo, udhëheqës i Qendrës Kosovare për Studimet të Sigurisë Ramadan Qehaja vlerësoi se Kosova është para një akti të kryer duke mos qenë pjesë e nënshkrimit të protokollit. Sipas tij, nënshkrimi i kësaj marrëveshje vetëm nga ana e EULEKS-it, do ta bëjë implementimin e kësaj marrëveshje të pamundur sepse EULEKS-i të vetmin burim të informacioneve në Kosovë e ka policinë e Kosovës.


"Nëse ne nuk do të përfshihemi në marrëveshje atëherë është e mundshme që bashkëpunimi të ngecë dhe kjo mund të ndodhë e aq më parë që në nivelin operativ shkëmbimi i informatave është i pamundur pa policinë e Kosovës sepse EULEKS-i të vetmin burim për informacione e ka policinë e Kosovës. Kisha me thanë se nënshkrimi i kësaj marrëveshje vetëm nga EULEKS-i në këtë fazë të zhvillimit tonë do ta bëjë implementimin e saj të pamundur."


Zyrtarë të EULEKS-it ndërkaq kanë thënë se nuk mund të konfirmojnë asgjë rreth kohës së nënshkrimit deri në finalizimin e këtij procesi. Në anën tjetër, mbrëmë janë deklaruar pro dokumentit vendet e Kuintit. Në deklaratën e përbashkët, është thënë se instrumentet e bashkëpunimit teknik të EULEX-it, të bëra në emër të vet, me Serbinë, janë në pajtueshmëri me mandatin e tij për të forcuar menaxhimin e kufijve dhe nuk kanë asnjë ndikim në çështjen e pavarësisë, sovranitetit dhe integritetit territorial të Kosovës.