TIRANË- Presidenti i Republikës, Bamir Topi ka dekretuar sot rreth ores 15.00 kryeministrin e vendit, Sali Berisha. Përmes një dekreti, kreu i shtetit Bamir Topi, në mbështetje të nenit 93 dhe 96, pika 1 të Kushtetutës së Shqipërisë, me propozim shumicës parlamentare, ka dekretuar Sali Berishën, Kryeministër të Republikës së Shqipërisë. Dekreti hyn në fuqi menjëherë.

Dekretimi vjen pak kohë pasi Partia Demokratike nëpërmjet sekretarit organizativ paraqiti pranë Presidentit të Republikës Bamir Topi një shkrese zyrtare për mandatimin e Berishës si kryeministër.

Vetëm pas këtij hapi, kreu i ekzekutivit do të paraqesë listën e ministrave të rinj dhe do t'ia propozojë për votim Kuvendit bashkë me programin qeverisës.

Në bazë të Kushtetutës, Presidenti i Republikës, në fillim të legjislaturës, emëron Kryeministrin me propozim të partisë ose koalicionit të partive, që ka shumicën e vendeve në Kuvend.

Më pas, Kryeministri i emëruar duhet të miratohet nga Kuvendi brenda 10 ditëve. Lista e ministrave të rinj do të jetë një tjetër kompetence e Kryeministrit Sali Berisha, i cili, sipas burimeve, është në përfundim të tij. Pas propozimit të listës, ministri emërohet nga Presidenti i Republikës, brenda 7 ditëve.

Ndërsa dekreti i Presidentit shqyrtohet brenda 10 ditëve nga Kuvendi. Prej ditësh, Kryeministri Berisha është përfshirë në një proces negociatash të vazhdueshme për formimin e qeverisë së re.

Pas përfundimit të negociatave me Lëvizjen Socialiste për Integrim, Kryeministri Berisha po negocion gjatë me të vetët, me qëllim ruajtjen e ekuilibrave brenda partisë.

Si asnjëherë tjetër, ashtu siç e ka pranuar edhe ai vete në daljet publike, lista e re e qeverisë ka qenë e vështirë për të, për shkak edhe të përfshirjes ë LSI-së, e cila deri para zgjedhjeve ishte e paparashikuar për bashkëqeverisje.

Berisha pritet të përfundojë qeverinë vetëm brenda dy ditëve, ndërkohe që nga kjo përbërje, padyshim pritet që të shfaqen edhe pakënaqësi, të cilat Kryeministri Berisha do t'i justifikojë me faktin se nuk ka vend për të gjithë.


Zyrtarizohet marreveshja Berisha-Mediu

TIRANË- Zyrtarizohet marrëveshja mes PD-së dhe PR-së për qeverinë e re. Në kryesinë e Kuvendit të Shqipërisë marrëveshja është firmosur mes Sali Berishës dhe kreut të PR-

Pas marrëveshjes, Berisha tha se marrëveshja ka në qendër çështjen e pronave e cila, sipas tij do të marrë zgjidhje brenda këtij mandati qeveritar.
Ndërkohë sot, kryeministri Sali Berisha pritet t'i japë fund sot negociatave me partitë aleate lidhur me qeverinë e re.

PR-ja ka pranuar propozimin e kreut të ekzekutivit për drejtimin e Ministrisë së Mjedisit si dhe përfaqësimin me dy zv-ministra në kabinetin e ri qeveritar. Pika e dytë e marrëveshjes, që do të firmoset sot, konsiston në përfaqësimin proporcional të PR-së në të gjitha nivelet e qeverisjes vendore dhe qendrore sipas kontributit të saj politik. Një pikë tjetër që jo pa qëllim është veçuar nga kryesia e PR-së është edhe rënia dakord për përfaqësimin në qeveri me kryetarin e kësaj partie, Fatmir Mediu.

Një tjetër parti, që mund të firmosë sot marrëveshjen është edhe Partia për Drejtësi dhe Integrim e çamëve. Kryetari i PDI-së, Tahir Muhedini, deklaroi dje se ata do të negociojnë sot me Berishën edhe pse prej ditësh, kjo forcë politike ka pritur një përgjigje zyrtare nga kreu i ekzekutivit, mbi rolin që PDI-ja do të ketë në qeverisjen e ardhshme.

Pas mbledhjes së kryesisë së kësaj partie, kryetari i saj, Tahir Muhedini, është shprehur se përfaqësimi i tyre në qeveri do të jetë një sukses, pasi qëllimi i PDI-së, në koalicion me Berishën është zgjidhja e çështjes çame, me të cilën, sipas tij, deri më tani është abuzuar shumë. Ai premton sensibilizim ndërkombëtar për ti dhënë zgjidhje këtij problemi ndaj dhe për këtë arsye, sipas tij, është e domosdoshme që përfaqësuesi i PDI-së të jetë në qeveri."Dje zhvilluam mbledhjen e kryesisë së partisë.

Në mbledhje u shprehëm se jemi të shqetësuar që po mbarojnë negociatat dhe partia e çamëve s'ka marrë asnjë propozim. Ne presim, dhe momentalisht jemi në pritje për të marrë pjesë në negociata për të marrë në qeveri rolin tonë përfaqësues"- tha Muhedini. Përpos pretendimit të kësaj partie, kryeministri Berisha ka vendosur që t'i rezervojë kësaj partie vetëm një post zv-ministri. Edhe pse PDI-ja përfaqësohet me një deputet, ashtu si edhe PR-ja, Berisha nuk do të ndjekë të njëjtën rrugë, duke parapëlqyer që brenda kësaj partie të sjellë përçarjen dhe për pasojë edhe zbehjen e pretendimeve të kësaj partie.

Po sot, kryetari i PBDNJ-së, Vangjel Dule do të japë një përgjigje përfundimtare për përfshirjen ose jo në qeverinë e Berishës. Prej ditësh, ai ka paralajmëruar një konference për shtyp, ndërkohe që bashkëpunëtori i tij i ngushtë, Leonard Solis, është shprehur se PBDNJ-ja po shqyrton ftesën e kryeministrit. Në rast se një gjë e tillë ndodh, atëherë Berisha është i gatshëm që t'i ofrojë sërish kësaj partie, postin e Ministrisë së Punës dhe Çështjeve Sociale, duke siguruar në të njëjtën kohë edhe një mandat më shumë në favor të mazhorancës.

Përpos vendimit të grupit parlamentar të PS-së për të mos marrë pjesë në punimet e sotme, kryetari i PBDNJ-së, Vangjel Dule, pritet që të jetë i pranishëm në punimet e sotme parlamentare, duke treguar në të njëjtën kohë që situatat politike kanë ndryshuar, që prej deklaratës së tij të fundit se nuk do të bashkëpunonte me Berishën.


6 shtator
PDI, Muhedini: Berisha të na përfshijë në qeveri
TIRANË- Partia Drejtësi e Integrim, (PDI) e njohur si partia e çamëve është e vendosur të kërkojë nga kryeministri përfshirjen e saj në qeverinë e re që.
Pas mbledhjes së kryesisë së kësaj partie, kryetari i saj, Tahir Muhedini është shprehur se përfaqësimi i tyre në qeveri do të jetë një sukses, pasi qëllimi i PDI-së, në koalicion me Berishën është zgjidhja e çështjes çame, me të cilën sipas tij, deri më tani është abuzuar shumë. Ai premton sensibilizim ndërkombëtar për ti dhënë zgjidhje këtij problemi dhe për këtë është e domosdoshme që përfaqësuesi i PDI-së të jetë në qeveri.

Nesër, sipas Muhedinit partia e tij do t'i zyrtarisht kryeministrit Berisha se pse po vonohet një marrëveshje qeverisjeje edhe me PDI. "Dje zhvilluam mbledhjen e kryesisë së partisë. Në mbledhje u shprehëm se jemi të shqetësuar që po mbarojnë negociatat dhe partia e çamëve s'ka marrë asnjë propozim. Ne presim, dhe momentalisht jemi në pritje për të marrë pjesë në negociata për të marrë në qeveri rolin tonë përfaqësues"- tha ai gjatë një interviste televizive.



Muredini i PDI kerkon nje ministri


dt 1 shtator

TIRANË - Kryetari i Partisë për Drejtësi dhe Integrim, Tahir Muhedini, ka dalë në konferencë për shtyp një ditë para nisjes së negociatave për formimin e qeverisë së re. "Në marrëveshjen që do të diskutohet me Kryeministrin Berisha, PDI do të kërkojë që të bëhet pjesë e qeverisjes së vendit, si pjesë e koalicionit fitues të zgjedhjeve të 28 qershorit", tha Muredini.

Më tej ai shtoi se "ne kërkojmë të përfaqësoheni në qeveri, duke kërkuar një post ministror". I pyetur nga gazetarët se cili është dikasteri i tyre i preferuar, shtoi se "kjo do të jetë pjesë e negociatave".

Partia për Drejtësi dhe Integrim, e cila mbron të drejtat e komunitetit çam në Shqipëri ka bërë një marrëveshje parazgjedhore me Partinë Demokratike, duke u bërë pjesë e koalicionit "Aleanca për Ndryshim", në zgjedhjet e 28 qershorit, nga rezultati i të cilave, PDI do të përfaqësohet në Kuvendin e Shqipërisë me një mandat deputeti. Në këtë koalicion është edhe Partia Republikane, e cila gjithashtu ka marrë vetëm një mandat deputeti dhe kërkon përfaqësim në qeveri.

Negociatat për formimin e qeverisë së re nisin nesër, me 2 gusht. Këtë e ka deklaruar Kryeministri Sali Berisha një ditë më parë, i cili shtoi se nuk do të ndryshojë numri i ministrive tashmë që koalicioni është zgjeruar. LSI, PDI dhe PR presin për poste ministrore.


dt. 3 shtator
Gjinushi pro Rames: Bojkot Parlamentit
TIRANË- Partia Socialiste mbledh nesër kryesinë dhe një ditë pas kësaj Grupin Parlamentar. Në qendër të diskutimit do të jetë vendimi i socialistëve për pjesëmarrje apo bojkot të parlamentit të ri, dalë nga zgjedhjet që PS-ja i ka kontestuar duke e quajtur rezultatin e tyre të papranueshëm.

Ndërkohë që sot, kreu i Partisë Socialdemokrate Skënder Gjinushi ka zhvilluar një takim kokë më kokë në selinë rozë me Kryetarin në detyrë të Partisë Socialiste Edi Rama. Sipas tij, në zgjedhjet e 28 qershorit, janë shkelur në mënyrë flagrante standardet demokratike, prandaj dhe si rrjedhim Kuvendi i Shqipërisë është ilegjitm.

"Mbështes Partisë Socialiste dhe kreun e saj Rama, për bojkot të parlamentit dhe për futjen e vendit në zgjedhje të parakohshme,pasi është e vetmja mënyrë që vendit t'i kthehet normaliteti"- tha Gjinushi pas takimit.

Sipas Gjinushit, bojkoti i parlamentit është vetën hapi i parë që mund të bëhet, pasi demokracia është cenuar rëndë, me qeveri dhe kuvend ilegjitm, më pas do të ndërmerren hapa për të garantuar zgjedhje të lira dhe të ndershme.

Takimi kokë më kokë midis Kryetarit në detyrë të PS-së Edi Rama dhe Kreut të PSD-së Skënder Gjinushi, u bë një ditë pas nënshkrimit të marrëveshjes ndërmjet Kryeministrit të vendit Sali Berisha dhe Kreut të LSI-së Ilir Meta për bashkëqeverisje të vendit.



TIRANË - I majti Ilir Meta do të jetë krahu i djathtë i Sali Berishës në qeverinë e ardhshme, në postin e zv/kryeministrit dhe ministrit të Punëve të Jashtme. Takimi i djeshëm, i paralajmëruar në ambientet e kryesisë së Kuvendit, mes Berishës dhe Metës, ishte krejtësisht formal. Ata firmosën publikisht marrëveshjen e arritur mes tyre përmes takimeve dhe negociatave informale, që aq shumë i kishin mohuar për mediat. Vetëm në pak minuta, Kryeministri Sali Berisha i shoqëruar nga Ridvan Bode firmosi formalisht marrëveshjen.

Të njëjtën gjë, i ulur në krahun e djathtë të Berishës, bëri edhe kryetari i LSI-së, Ilir Meta, i shoqëruar nga Edmond Haxhinasto. Në qeverinë e re, Ilir Meta do të jetë krah Berishës, ndërsa për hir të qeverisë së pagëzuar si Qeveria e Integrimit Europian, ai do të drejtojë edhe Ministrinë e Jashtme.

Ashtu siç e konfirmoi edhe vetë Meta, në postin e ministrit të Shëndetësisë, dikasterit të dytë që do të drejtojë LSI-ja, do të emërohet Petrit Vasili. Pavarësisht se Shëndetësia është cilësuar prioritare në programin e PD-së, Kryeministri Sali Berisha, u shpreh se kishte besim të plotë tek puna e Petrit Vasilit, ashtu siç kishte deklaruar në fakt pak kohë më parë edhe për ministren në detyrë, Anila Godo.

Ndërsa dikasteri i tretë për LSI-në, Ministria e Ekonomisë, Tregtisë dhe Energjetikës, do të drejtohet nga Dritan Prifti. Si rezultat i ndërrimit të drejtimit të dikastereve, kryetari i LSI-së, Ilir Meta, ka siguruar dje se marrëveshja e arritur nuk do të cenojë statusin e nëpunësit civil. "Morali ynë nuk është për të hequr njerëz nga puna, por për të hapur vende të reja pune",- tha ndër të tjera Meta.

Në marrëveshje thuhet se PD-ja dhe LSI-ja bien dakord që përfaqësimi i LSI-së në qeverisje të jetë 20% e organeve të pushtetit dhe strukturave qeverisëse, duke respektuar ligjin "Për statusin e Nëpunësit Civil". Ndërkohë, përfaqësimi i LSI-së në të gjitha nivelet e pushtetit, nivelet drejtuese dhe administrative, hallkave të tjera të pushtetit në nivel qendror dhe atij vendor, do të jetë në masën e 20%-shit.

Po sipas marrëveshjes, LSI-ja do të marrë edhe postin e zv-Kryetarit të Kuvendit, që pritet të drejtohet nga deputeti i Beratit, Nasip Naco. Kryeministri Sali Berisha ka deklaruar dje pas firmosjes së marrëveshjes së qeveria e re do të jetë solide dhe afatgjatë, duke shkuar tej parashikimeve, teksa u shpreh se koalicioni me Metën do të vazhdojë edhe për zgjedhjet e ardhshme parlamentare të 2013-ës.

Marrëveshja e firmosur dje mes Berishës dhe Metës është konsideruar nga të dyja palët e suksesshme dhe eficente, pavarësisht se, siç u shprehën edhe ata vetë, jo për çdo gjë është rënë dakord. Një ndër kushtet e parealizuara të LSI-së është pikërisht kërkesa e saj para dhe pas zgjedhore për realizimin e referendumit për ndryshimet në Kushtetutë. Edhe pse theksoi se kjo mbetet një sfidë afatgjatë, kryetari i LSI-së, Ilir Meta, la të kuptohet se një hap i tillë nuk do të ndërmerret, ndërkohë që ka marrë sigurinë e Kryeministrit vetëm për reformimin e Kodit Zgjedhor, me qëllim eliminimin e çdo diskriminimi që cenon barazinë e konkurrimit politik.



Berisha: Qeveria e re do ketë surpriza. Drekë private me "të vjetrit"
TIRANË- Është mbajtur sot në orën 11:00 mbledhja e fundit e qeverisë "Berisha 1" që nisi punën në shtator të 2005-s. Berisha ka bërë një rezyme të sukseseve të arritura nga kjo qeveri që sipas tij edhe pse ka pasur ndryshime ka qenë kompakte për 4 vjet.

"Propozimi i Qeverisë së re është një proces kompleks, dhe unë nuk e di se cili prej jush do të ulet në këto vende pas 10 ditësh, apo dy javësh. Por ata që do të mungojnë nga ju, absolutisht që nuk do të mungojnë nga moskonsideratat e mia dhe as nga mungesa e kontributit të tyre parësor në këto 4 vite", tha Kryeministri Berisha duke i'u drejtuar anëtarëve të kabinetit të tij qeveritar.

Ndersa gazetarëve, iu drejtua se sot pasdite do prisni surpriza. "Qeveria 'Berisha 2 'do të jetë kabinet që do të dalë jashtë parashikimeve tuaja, por ju lutem të prisni deri pasdite", u shpreh ai.

Ndërkohë përsa i përket sukseseve të kësaj qeverie ai renditi, anëtarësimin në NATO, rrugën Durrës-Kukës dhe rritjen e pagave dhe pensioneve. Në fund ai ka lajmëruar se do të ketë një drekë private me të gjithë ata që kanë qenë anëtarë të kabinetit 'Berisha 1' që nga 2005 e deri më tani.