Kreu i AKKP-së, sqaron se procesi është duke shkuar normalisht por shton se janë duke u përballur me vonesa nga kadastrat

Brenda këtij muaji AKKP duhet të shpallë fituesit e fondit 600 milionë lekësh të kompensimit
TIRANË- Zyrat e kadastrave nëpër qarqe mund të bëhen shkaktare për vonesa madje dhe bllokimin e shpalljes së listës së përfituesve nga fondi prej 600 milionë lekësh për kompensimin financiar të pronarëve.

Sipas Drejtorit të Përgjithshëm të Agjencisë së Kthimit dhe të Kompensimit të pronave, Elvis Çefa, kjo agjenci është duke punuar me ritmet e duhura për të shqyrtuar të gjitha dosjet e dorëzuara nga aplikantët e këtij viti ndërsa, shton se janë zyrat e kadastrave ato që janë duke u vonuar në kryerjen e verifikimeve të kërkuara.

Edhe vitet e mëparshme vonesat e shkaktuara nga kadastrat e qarqeve kanë ndikuar në vonesa dhe djegien e fondeve për kompensimin e ish-pronarëve. "Jemi duke punuar intensivisht për shqyrtimin e të gjitha dosjeve që janë dorëzuar nga aplikantët në zyrat tona.

Mund të them se nevojitet që kadastrat të jenë më të shpejta në kryerjen e verifikimeve të kërkuara nga ne, pasi kemi hasur në vonesa. Tashmë jemi brenda afatit dhe besoj se në fund të shtatorit ose në fillim të muajit tetor, lista me përfituesit do të jetë gati dhe do të shpallet", - tha kreu i AKKP-së.

Më tej Çefa shpjegon se, sipas ligjit AKKP-ja duhet që të shpallë listat brenda një afati prej tre muajsh nga mbyllja e aplikimeve me të drejtë shtyrje edhe për një muaj.

Zyrat e kadastrave, bëjnë verifikimin e të dhënave që aplikantët kanë dorëzuar pranë Agjencisë së Kthimit dhe Kompensimit të Pronave gjatë afatit prej 30 ditësh të shpallur në muajt qershor-korrik nga AKKP-ja.

Me kryerjen e këtyre verifikimeve, shpallet edhe lista me përfituesit nga fondi prej 600 milionë lekësh që është parashikuar të përdoret për kompensimin financiar të pronarëve.

Kompensimi do të bëhet duke u bazuar në çmimet që pasqyrohen në hartën e vlerës së tokës, miratuar nga Këshilli i Ministrave.
Agjencia e Kthimit dhe Kompensimit të Pronave është duke verifikuar dosjet për të shpallur fituesit bazuar në disa kritere.

Kështu, në mënyrë që dosja të merret në konsideratë, aplikanti nuk duhet të ketë përfituar nga kompensimet financiare që janë bërë gjatë viteve të shkuara, nuk duhet të ketë përfituar tokë me shpërndarjen që u bë në fillim të viteve 90-të në bazë të ligjit Nr. 7501 dhe nuk duhet të ketë përfituar nga e drejta e parablerjes.

Kompensimi financiar, do të bëhet vetëm për sipërfaqet truall deri në 200 metra katrorë, të caktuar për kompensim, në bazë të çmimit të përcaktuar në hartën e vlerës së miratuar nga qeveria sipas vendndodhjes së pronës.

Gjatë hartimit të buxhetit të këtij viti, qeveria ka përcaktuar një fond prej 600 milionë lekësh për kompensimin financiar të pronarëve.

Gjithashtu, në rishqyrtimin e buxhetit të vitit 2009 që u bë javën e kaluar, u kalua në llogari të kompensimit financiar të pronarëve edhe 10 për qind e vlerës së privatizimit të Operatorit të Sistemit të Shpërndarjes.

Gjatë procesit të dorëzimit të kërkesave, drejtues të AKKP-së vazhdimisht iu bënë thirrje aplikantëve që të tregohen të vëmendshëm ndaj vërtetësisë së dokumentacionit , pasi në të kundërt do të përballeshin më sanksione.

Bazuar edhe në një vendim të qeverisë, AKKP-ja ka të drejtë që të përjashtojë menjëherë nga procedurat e kompensimit të gjithë ata që paraqesin të dhëna të rreme, apo që i fshehin ato, duke i ngarkuar edhe me përgjegjësi penale.
Elbasan, gati listat e kompensimit të pronarëve

ELBASAN- Agjencia e Kthim-Kompensimit të Pronave në Elbasan është ndër të paktat që ka hartuar dhe dërguar listën e re të pronarëve të vjetër për kompensim drejt Tiranës për të përfituar nga fondi i vënë në dispozicion për vitin 2009.

Kreu i kësaj agjencie, Dëfrim Bulica, tha se këtë vit janë hartuar të gjitha dokumentet dhe nuk ka pasur probleme as nga institucionet e tjera lidhur me sipërfaqen e kompensueshme.

Këto dosje të përfunduara nga specialistët me dokumentacionin përkatës të plotësuar nga pronarët e vjetër ose trashëgimtarët tashmë janë pranë agjencisë qendrore dhe pritet të kalojnë për miratim në qeveri bashkë me fondin përkatës.

Ndërkohë, sipas Bulicës, vazhdon procesi nga ana e Agjencisë së Legalizimeve për kompensimin e hapësirës së zënë për ndërtimet pa leje.

Pritet që mes dy institucioneve të ketë një koordinim mbi kompensimin e familjeve të pronarëve të vjetër por kjo ende nuk ka ndodhur dhe dy institucionet veprojnë të ndara.

Legalizimet vendosin në dosjen për kompensim vetëm sipërfaqen e zënë nga ndërtimi pa leje dhe për këtë arsye pronarëve të vjetër u mbetet një sipërfaqe tjetër që mund të mos jetë ndërtim për legalizim, e pa kompensuar. Aktualisht nga agjencia e Legalizimeve janë dërguar për kompensim rreth 40 pronarë të vjetër.