Presidenti Fatmir Sejdiu vlerëson se këto zgjedhje janë shumë të rëndësishme për imazhin e Kosovës në botë, prandaj të gjitha partitë politike duhet të angazhohen maksimalisht për një proces korrekt dhe të ndershëm.

Sejdiu ka theksuar se liderët e partive duhet t’i bëjnë thirrje elektoratit që të përmbahen nga çfarëdo veprimi që eventualisht mund ta cenojë ecurinë e mbarë të këtij procesi.

Presidenti i vendit i bëri këto komente gjatë një takimi që ka zhvilluar me liderin e Aleancës për Ardhmërinë e Kosovës (AAK), Ramush Haradinaj.

“Zgjedhjet e sivjetshme lokale janë zgjedhjet e para që organizohen nga institucionet e shtetit të pavarur dhe sovran të Kosovës, ndaj është tepër e rëndësishme që ato të përgatiten si duhet dhe të përmbyllen sipas standardeve më të larta demokratike”, u shpreh Sejdiu, transmeton Presidenca.

Presidenti Sejdiu, gjithashtu, tha se është shumë e nevojshme që institucionet e Republikës së Kosovës të bashkëpunojnë ngushtë me të gjitha subjektet politike të vendit, me qëllim që si shtet t’i përballojmë sfidat që kemi përpara.

Ndërkaq, kryetari i AAK-së, Haradinaj tha se partia që ai drejton do të punojë edhe më tej për realizimin e aspiratave dhe interesave të qytetarëve të Republikës së Kosovës. Sa u përket zgjedhjeve të sivjetshme, ai theksoi se AAK-ja bën thirrje për një proces korrekt zgjedhor, i cili duhet të sigurojë respektimin e plotë të vullnetit të zgjedhësve.