LDD, AAK dhe ORA po vazhdojnë përpjekjet për të qenë bashkë në Prishtinë më 15 Nëntor. Nënkryetari i Parë i AAK’së, Blerim Shala paralajmëron bisedime intesive mes partnerëve javën e ardhshme. Por, Kryetari i LDD’së, Nexhat Dacit, duket të jetë komod. Ai thotë se ka kohë për kandidatin e kryeqytetit.

Tri partitë opozitare - Aleanca për Ardhmërinë e Kosovës, Lidhja Demokratike e Dardanisë dhe Partia Reformiste ORA - po vazhdojnë përpjekjet për të qenë bashkë në Prishtinë më 15 Nëntor. Ato synojnë të gjejnë një kandidat për Kryetar të Komunës së Prishtinës, rreth të cilët do të mblidheshin në zgjedhjet e sivjetme lokale, që mbahen të dielën e tretë të muajit nëntor.

Deri më tash këto përpjekje kanë rezultuar të kota, pasi që AAK dhe LDD nuk u pajtuan rreth emrave që kishin në tavolinë. Nënkryetari i Parë i AAK’së, Blerim Shala nuk pranoi të futej në garë, e kandidatura e Naser Rugovës që erdhi nga LDD, nuk gjeti përkrahej në AAK. Megjithëkëtë, asgjë nuk është mbyllur. Nënkryetari i Parë i AAK’së, Blerim Shala paralajmëron bisedime intensive mes partnerëve ditëve të ardhshme.

“Parimisht tash e disa kohë ka qenë opsion i favorizuar nga Aleanca që këto tri parti ta kenë kandidatin e përbashkët. Absolutisht, është qëndrim i përqafuar në Aleancë”, ka thënë Shala për Express të premten. “Ka qenë në shqyrtim dhe mbetet në shqyrtim, gjithnjë në bazë të kandidaturave që ofrojnë këto parti”, ka shtuar ai. Sipas tij, për këtë synim ekziston mirëkuptim mes tri partive, mirëpo nuk ka asnjë marrëveshje.

“Nuk ka pasur biseda, mirëpo parimisht ekziston një mirëkuptim që të ketë marrëveshje për një kandidat”, ka thënë ai. Nënkryetari i Parë i AAK’së ka mohuar të ketë pasur mospajtime mes partnerëve rreth emrit të ndonjë kandidati, pasi që, thotë ai, bisedimet nuk kanë arritur deri në atë shkallë.

“Do të përpiqemi maksimalisht për ta gjetur një kandidat të përbashkët. Më siguri që do të kemi takime intesive në këtë javën që na ka mbetur, deri te afati për certifikimin e partive”, ka thënë Shala. Ai ka shtuar se për emrin e kandidatit të përbashkët nuk do të merret parasysh përqindja e votave të fituara në zgjedhjet e fundit.