Zgjidhja brenda muajit?

Vizitor · 1 Zgjidhja brenda muajit? prej 5/9/2009, 13:27

Vizitor

Ambasadori i SHBA’së në Prishtinë, Christopher Dell dhe Shefi i ICO’së, Pieter Feith, kanë takuar të premten Presidentin Fatmir Sejdiu dhe Kryeministrin Hashim Thaçi. Ata kanë biseduar rreth çështjes së bashkëpunimit policor mes EULEX’it dhe Beogradit. Zyrtarët europianë presin që një zgjidhje e kënaqshme të arrihet brenda këtij muaji.

Përfaqësuesi special i Bashkimit Europian në Kosovë, Pieter Feith, dhe krerët e institucioneve, Presidenti Fatmir Sejdiu dhe Kryeministri Hashim Thaçi, janë duke zhvilluar konsultime intensive për të parë se a ka mundësi të gjendet një zgjidhje për vendosjen e bashkëpunimit policor mes EULEX’it dhe Beogradit, e cila do të ishte e pranueshme për Prishtinën zyrtare, ka thënë të premten për Express, një zyrtar i BE’së, me kusht anonimiteti.

Sipas zyrtarit europian, aktualisht të gjitha opsionet janë të hapura për të arritur te formula e përshtatshme. Ai ka thënë se është prioritet i Bashkimit Europian që zgjidhja për aranzhime teknike mes EULEX’it dhe autoriteteve serbe të arrihet gjatë këtij muaji.
Një takim i paparalajmëruar për media mes Feith’it dhe Sejdiut e Thaçit është mbajtur edhe të premten, në Zyrën e Presidentit të Kosovës. Aty ka marrë pjesë edhe Ambasadori i SHBA’ve në Kosovë, Christopher Dell.

Shefi i EULEX’it, Yves de Kermabon, nuk është ftuar në këtë mbledhje. Zëdhënësi i Presidentit, Xhavit Beqiri ka thënë se ky takim mes këtyre zyrtarëve ka qenë rutinor. I pyetur për zhvillimet rreth bashkëpunimit policor mes Misionit të BE’së dhe Beogradit, ai ka përsëritur qëndrimin e udhëheqësve kosovar.

“Në emër të Kosovës marrëveshje të tilla bashkëpunimi mund të nënshkruajnë vetëm institucionet e Kosovës. Njëkohësisht është gjithmonë dera e hapur për bashkëpunim. Ne kemi bashkëpunim të mirë me ICO’në, EULEX’in dhe gjithë mekanizmat tjerë ndërkombëtar”, ka thënë Beqiri për Express, të premten.

Mbajtjen e këtij takimi e ka konfirmuar edhe Zëdhënësi i Zyrës Civile Ndërkombëtare, Andy McGuffie. “ICO dhe institucionet e Kosovës pajtohen se është shumë e rëndësishme që të ketë mekanizma të duhur për të forcuar sundimin e ligjit në Kosovë. Është e qartë se EULEX’i ka nevojë të ketë mjetet për të kryer punën e vet. Do të vazhdojnë përpjekjet për të gjetur shtegun e duhur për këtë, me të cilin secili do të ndihej rahat”, ka thënë ai.

1 Zgjidhja brenda muajit? prej 5/9/2009, 13:27

Vizitor