Menaxheri i Manchester City, Mark Hughes, ka thënë se nuk planifikon të përsërisë blerjet e bujshme nga dy afatet kalimtare të fundit. Hughes ka shpenzuar afro 120 milionë funta këtë verë në tetë futbollistë të rinj dhe ka thënë se tani do të përqendrohet në integrimin e tyre në ekip, për të paraqitur konkurrencë për një vend në katër pozitat e para në Premierligë.

“Ne nuk do të hyjmë më në afat kalimtar në këtë shkallë. Kemi bërë ndryshime të mëdha në përbërje. Ishte një proces që është dashur të bëhet brenda tre deri pesë viteve, por ne jemi munduar ta bëjmë për dy afate kalimtare. Në të ardhmen do të kërkojnë vetëm futbollistë të cilët mund të shtojnë vlerën e klubit dhe të zhvillohen në futbollistë të mëdhenj në City”, tha Hughes për të përditshmen angleze The Guardian.

Hughes po ashtu ka bërë të ditur se planet e rindërtimit të ekipit janë formuar pas një takimi të tij me pronarin Sheikh Mansour dhe presidentin Khaldoon al-Mubarak në Abu Dhabi, dhjetorin e kaluar. Hughes ka theksuar se ekipi i tij aktual është i balancuar mirë. “Pjesa kryesore e ekipit është e dizajnuar nga unë. Jemi në gjendje të mirë, pasi jemi përforcuar mirë dhe në pozitë më të mirë se ku ishim 12 muaj më parë”, përfundoi ai.