Novara e ka transferuar futbollistin kosovar Rijat Shala. Këtë lajm e ka bërë të ditur klubi italian përmes uebfaqes së vet zyrtare. “Shoqëria Novara Calcio zyrtarizon në këto orë transferimin përfundimtar të futbollistit Rijat Shala”, shkruan në komunikatë.

Shala i ishte bashkuar këtij klubi ditëve të fundit në përgatitje, ndërsa me cilësitë e tij i ka bindur zyrtarët e klubit Novara, ku luan edhe kosovari tjetër, portieri Samir Ujkani. Mesfushori Shala, i cili ka nënshtetësi zvicerane, është rritur në klubin e Luganos, ku ndenji deri në vitin 2003.

Më pas pati disa eksperienca, para se të transferohej në futbollin italian në sezonin 2004/05, përkatësisht në ekipin Salernitana. Aty qëndroi dy sezone në Serie B e Serie C1, para se të kalonte te Foggia.

Ngritjen më të madhe, 25 vjeçari nga Prizreni e pati në verën e vitit 2007, kur u transferua te Cagliari, prej nga pas 6 muajsh shkoi në Taranto, me të cilin klub i prishi punët për shkak të problemeve financiare.