Gripi i derrit ka prekur kontingjentin e ushtarëve shqiptarë në Afganistan. Ushtari Denis Sulku ndodhet prej 4 ditësh nën kura në spitalin e kontingjentit spanjoll, kurse Neshat Hoxha dhe dy të tjerë janë vendosur në karantinë, në një çadër të veçantë në bazën në Farah. Lajmi është bërë i ditur fillimisht nga familjarë të kontingjentit të ushtarëve shqiptarë në Afganistan dhe më pas është konfirmuar nga shefi i shtabit të përgjithshëm të ushtrisë, Maksim Malaj, shkruan sot Gazeta Shqiptare

Shkak për virusin, familjarët e ushtarëve kanë “identifikuar” kushtet e vështira dhe mungesën e higjienës në ambientet ku qëndron kontingjenti shqiptar në Afganistan.

“Është e vërtetë që disa nga ushtarët tanë të cilët janë me mision në Afganistan kanë paraqitur probleme me gripin e derrit”, ka thënë Malaj. Por ai ka sqaruar se gjendja shëndetësore e tyre është e stabilizuar dhe nuk është shoqëruar me komplikacione. “Të gjithë ushtarët tanë janë në gjendje të mirë shëndetësore, ndërkohë që po marrin ndihmën e specializuar për të shmangur çdo përkeqësim të situatës”.

Merret vesh se tre javë më parë, gripi i derrit kishte “goditur” kontingjentin spanjoll. Tetë ushtarë të këtij kontingjenti, pasi kishin marrë ndihmën e parë mjekësore, ishin dërguar për kurim në klinikat speciale në Spanjë. Një veprim i tillë duket se është parë i panevojshëm nga drejtuesit e ushtrisë shqiptare, të cilët janë mjaftuar me kujdesin që po i bëjnë mjekët spanjollë në bazë ushtarit Sulku dhe me mbikëqyrjen që u bëhet atje 3 ushtarëve të tjerë që janë në karantinë.