Komisioneri për Zgjerimin i Komisionit Evropian, Oli Rehn, deklaroi se Komisioni Evropian nga mesi i vitit 2010 mund propozojë heqjen e vizave për Shqipërinë dhe Bosnjë-Hercegovinën.

“Ne kemi si qëllim, që Shqipëria dhe Bosnjë Hercegovina të ndjekin rrugën e fqinjëve të tyre sa i përket liberalizimit të vizave. Nëse ata vazhdojnë reformat dhe plotësojnë kushtet, Komisioni Evropian mund të bëjë një propozim në mes të 2010-ës dhe kjo do të ndikojë shumë pozitivisht në jetën e banorëve të këtyre vendeve”, deklaroi Rehn.

Në këtë kuadër, ai paralajmëroi se “shpejtësia e Shqipërisë dhe Bosnjës në rrugën e liberalizimit të vizave është në duart e qeverive dhe liderëve të këtyre vendeve”.

"Në momentin që propozimi ynë do të hyjë në fuqi, të gjithë shtetasit e Shqipërisë dhe Bosnjës, do të mund të hyjnë në vendet e zonës Shengen duke paraqitur vetëm pasaportat e reja që sigurisht duhet të jenë biometrike", ka thënë Rehn, transmeton Ina.