PRISHTINE - Autoritetet në Kosovë dorëzojnë sot në Gjykatën Ndërkombëtare të Drejtësisë deklaratën e dytë me shkrim në mbrojtje të Pavarësisë së vendit. Ministri i Jashtëm i Kosovës, Skënder Hyseni, tha se dokumenti me 160 faqe siguron të gjitha faktet e nevojshme në mbrojtje të legjitimitetit të Pavarësisë.

Hyseni edhe njëherë u shpreh optimist në një mendim të paanshëm të Gjykatës së Hagës. Sot është data e fundit ndaj Kosovës për dorëzimin në Gjykatën Ndërkombëtare të deklaratës së dytë me argumentet për pavarësinë e shpallur më 17 shkurt 2008.

Gjatë një konferencë për shtyp, ministri Hyseni tha se "pala kosovare ka shqyrtuar me kujdes gjitha deklaratat e para të dorëzuara në Gjykatën Ndërkombëtare të Drejtësisë dhe se dokumenti prej 160 faqe që dorëzohet sot u përgjigjet me fakte të mjaftueshme të gjitha pretendimeve që i kanë shtruar shtetet e caktuara në këtë gjykatë kundër pavarësisë së Kosovës".

Në deklaratën e Kosovës janë përfshirë gjitha njohjet që kanë ndodhur deri më tani, konfirmoi Hyseni. Pas këtij procesi, pritet që me 1 dhjetor në Gjykatën Ndërkombëtare të Drejtësisë të nisin seancat dëgjimore. Ministri Hyseni tha se ende nuk dihet kohëzgjatja e seancave mirëpo pritet që ato të përfundojnë brenda muajit dhjetor.

Pastaj, gjykatës i duhen disa muaj për të shprehur mendimin këshill-dhënës për legjitimitetin e Pavarësisë së Kosovës. Ministri Hyseni shprehu sërish bindjen e institucioneve të Kosovës në paanshmërinë e opinionit që gjykata do të bëjë për legjitimitetin e shpalljes së Pavarësisë së Kosovës. Hyseni tha se menjeherë pas përfundimit të këtij procesi shumë vende do ta njohin Pavarësinë e Kosovës.