Largimi i Labinot Harbuzit nga skuadra e Malmos si duket është vetëm çështje kohe. Destinacioni i ardhshëm i tij, sipas të gjitha gjasave, do të jetë Superliga e Turqisë.

Sipas ueb sajtit Sporyolu, mesfushori kosovar tashmë ka nënshkruar një para-kontratë me skuadrën turke Genclerbirligi. Sipas tyre, 23 vjeçari i ekipit të ri pritet t’i bashkohet gjatë muajit tetor, atëherë kur i skadon kontrata me Malmon.

Ndërsa edhe vetë Harbuzi ka thënë se gjatë këtij muaji do të dihet gjithçka rreth së ardhmes “Në dy javët e ardhshme pritet të jetë gjithçka e çart rreth s klubi të ri”, ka thënë kosovari për mediat suedeze.

Harbuzi nuk ka arritur marrëveshje me drejtuesit e Malmos për vazhdimin e kontratës, pasi dëshira e tij është të luajë jashtë vendit. “Dua të luaj jashtë vendit dhe kush nuk do ta shfrytëzonte rastin që do ta kishte”, theksoi ai.

Në anën tjetër, interesimin për anëtarin e përfaqësueses U-21 të Suedisë e ka konfirmuar edhe agjenti i tij Oliver Cabrera. Madje ky i fundit ka thënë se ka pranuar një ofertë nga një klub ku futbolli është ‘religjion’.

“Labinoti ka oferta nga klube të ndryshme, mirëpo ne ende nuk kemi filluar të negociojmë. Këtë do ta bëjmë javën e ardhshme”, ka thënë Cabrera.

Zlatan ndihmoi Harbuzin

Mesfushori kosovar gjatë periudhës së vështirë nëpër të cilën kaloi këta muaj, vazhdimisht ka marrë këshilla nga miku i tij Zlatan Ibrahimoviç. “Zlatani më ka ndihmuar shumë gjatë kësaj kohe, por unë në fund e kam thënë fjalën përfundimtare”, theksoi kosovari.

Skeraj testohet në Genclerbirligi

Ish futbollisti i FC Prishtinës, i cili së fundmi ka luajtur me Greuther Furthin në Bundesliga 2, Shqipron Skeraj në javën e ardhshme do t’i bashkohet skuadrës turke Genclerbirligi,

“Javën tjetër do të shkoj në Zvicër. Atje po i kryen përgatitjet ekipi nga Superliga e Turqisë, Genclerbirligi. Bashkë me këtë ekip do të ushtroj një javë.”, ka thënë Skeraj për Express.