Situata në kampin bardheblu duket se nuk po gjen qetësi. Kur mendohej se marrëveshja e nënshkruar mes klubit, të përfaqësuar nga shefi Rauf Dimraj, dhe kryedonatorit Refik Halili, u kishte dhënë zgjidhje dhe drejtim punëve te Tirana, paskësh qenë iluzion. Sepse shefi i klubit, duke marrë nisma të njëanëshme, pa miratimin edhe të kryedonatorit Halili, sic ishte rasti për ankandin e firmës që do të reklamojë në fanellën bardheblu për sezonin e ri, duket se ka krijuar carjet e para, në një periudhë krejt të pafavorshme, vetëm pak ditë para ndeshjes së Ligës së Kampioneve me Stabaekun. I pari që e ka ngritur shqetësimin për moszbatimin e kontratës së nënshkruar mes dy palëve, ka qenë kryedonatori Halili. Ai ka atakuar shefin Dimraj, se po tejkalon kompetencat, madje po shkel edhe pikat e kontratës së firmosur tashmë, cka përbën një situatë të padenjë për një klub si Tirana. Gjithashtu, drejtori teknik i bardhebluve, Alban Tafaj, duke iu referuar rastin të Gentian Mucës, që konsiderohet si lojtar i Tiranës, por luajti me Dinamon në ndeshjen me Lahtin, pasi shefi i klubit nuk e ka reklamuar problemin e tij në FSHF, në mënyrë të cuditshme. Kjo situatë, që paska ekzistuar nën rrogoz deri tani, duket se ka plasur tashmë, pasi një përfaqësi i tifozëve të Tiranës, të premten, para seancës stërvitore të pasdites, kanë bllokuar fushën e stërvitjes “Skënder Halili“, duke kërkuar largimin e menjëhershëm të shefit të klubit, Rauf Dimraj. Sipas tyre, shefi Dimraj po i fut shkopinj nën rrota skuadrës së tyre të zemrës, po punon në dëm të saj, sic është edhe rasti i lejimit të Gentian Mucës, që të luajë me Dinamon, ndërkohë që nuk ka vënë asgjë nga burimet financiare të llogarisë së klubit në dispozicion të skuadrës. Protesta e ditës së premte të tifozëve bardheblu ka zgjatur rreth cerek ore, për t’ua lënë më pas skenën lojtarëve për stërvitje, por kanë paralajmëruar vijimin e këtyre demonstrimeve kundër shefit të klubit, madje duke shkuar më tej, se Zoti Dimraj do të përballet me to edhe para zyrës së tij. Në rast mosreagimi, tifozët e Tiranës kanë kërcënuar se nuk do ta lejojnë skuadrën të dalë në fushë, ditën e ndeshjes me Stabaekun. Zhvillime të papritura, në dukje këto në kampin bardheblu, por që duket se do të ndikojnë negativisht në ecurinë e skuadrës, që tashmë ka caktuar edhe trajnerin e ri, kroatin loncarevic, ka arritur akordin me shumicën e lojtarëve që u shpallën kampion sezonin e kaluar, pret të përfaqësohet me dinjitet në Ligën e Kampioneve. Mbetet për t’u parë situata në ditët në vijim, për të kuptuar se si do të përfundojnë ky konfrontim i nisur tashmë, mes tifozëve të Tiranës dhe shefit të klubit bardheblu, Rauf Dimraj.