Deputetët e Kuvendit të Kosovës, në vazhdim të seancës së rregullt plenare, miratuan të premten në parim, Projektligjin kundër korrupsionit, i cili nga shumica e ligjvënësve u konsiderua tejet i rëndësishëm për fuqizimin dhe funksionimin e institucioneve vendore, posaçërisht në aspektin e luftimit të korrupsionit.

Ky projektligj i sponsoruar nga Ministria e Drejtësisë, u konsiderua i nevojshëm për rrethanat e reja në Kosovë, por se u kritikua nga një pjesë e ligjvënësve opozitarë.

Vërejtjet më të mëdha për këtë projektligj i pati Grupi Parlamentar i AAK’së, deputetët e të cilit besojnë se projektligji ka një boshllëk të brendshëm që nuk i adresohet gjithë institucioneve, por vetëm Agjencisë Kundër Korrupsionit.

Deputetja e AAK-së, Donika Kada-Bujupi kërkoi që projektligji t’i kthehet qeverisë në rishkrim, sepse sipas saj, është tërësisht i paqartë dhe i palogjikshëm. “Nuk e mbështesim këtë projektligj, prandaj kërkojmë që ai të rishkruhet
sepse nuk ka asgjë në të”, u shpreh Kada-Bujupi.

Edhe Lulzim Zeneli nga Grupi Parlamentar i Lidhjes Demokratike të Dardanisë (LDD) pati vërejte në hartimin e këtij projektligj, edhe pse tha se ligji si i tillë është shumë i nevojshëm në një shoqëri të korruptuar. “Ligji është megaloman, ndërsa materia e tij përmban vetëm organograme, ndërsa planin e veprimit ia adreson vetëm AKK-së”, tha ai.