Sipas medias franceze, Lorik Cana do të kalojë te kampionët e Gjermanisë për sezonin e ri

Olimpiku i Marsejës duket se do të fitojë 14 milionë euro nga shitja e dy lojtarëve kryesorë të tij, konkretisht të kapitenit Lorik Cana dhe Karim Ziani tek Volfsburgu. Kështu shkruan adresa franceze "foot01.com", e cila shton se ky është një "kumar" i guximshëm nga ana trajnerit Deshamp: "Duket se e hëna do të jetë dita e zyrtarizimit të këtyre marrëveshjeve mes klubeve respektive. Të dy lojtarët duhet të jenë ditën e parë të javës që vjen në Gjermani, ku, sipas të gjitha gjasave, do të bëhen pjesë e Bundesligës. Shuma e ofruar për të dy është nga 7 milionë euro secili.

Lorik Cana është një mesfushor i rrëmbyer, luftarak dhe me ndjenjën e kryerjes sa më mirë të detyrës. Duhet thënë se Lorik Cana u kthye në një lojtar jetik për Olimpik Marsejë, vetëm pak kohë pas arritjes së tij nga PSG." Megjithatë, po sipas "foot01.com", për Canën vazhdon akoma interesimi nga gjermanët e Hamburgut, kështu që ata duhet të vendosin para së hënës. Edhe adresa tjetër franceze, "Sport 365", e dërgon Lorik Canën tek Volfsburgu. Adresa në fjalë shkruan: "Pavarësisht një kontrate deri në qershor 2012, që mesfushori i kombëtares shqiptare ka me klubin e Marsejës, kapiteni i OM duhet të takohet me udhëheqësit e klubit gjerman gjatë ditës së hënë. Historia e kësaj transferte është në limitin e saj, madje tashmë janë bërë të ditura edhe detajet e largimit të Canës drejt kampionëve të Gjermanisë. Shuma e operacionit: 7 milionë euro, për një kontratë 4 vjeçare."