Kryeministri i Kosovës, Hashim Thaçi, ka refuzuar të dielën të komentojë koalicionin parimor mes LSI’së së Ilir Metës dhe Koalicionit për Ndryshim të Sali Berishës të shpallur të shtunën, duke pasuar rezultatet preliminare zyrtare të zgjedhjeve të 28 shtatorit.

Lëvizja Socialiste për Integrim vendosi të hynte në Qeverinë e re duke shmangur rrugëtimin e Shqipërisë në zgjedhje potenciale të parakohshme dhe kështu edhe rrezik të procesit të integrimit të saj.

“Unë e kam theksuar edhe më herët se nuk është e drejtë nga ne në Kosovë dhe gjithashtu edhe nga Tirana që të interferojmë apo të prezantojmë preferencat e skemave partiake”, ka deklaruar Thaçi, të dielën gjatë një vizite në komunën e Sharrit.

“Unë ndihem tepër mirë për bashkëpunimin e shkëlqyeshëm që kemi me institucionet e Shqipërisë, kështu që e ritheksoj bindjen se çdo preferencë lideri, ideologjie apo partie për ne është zhvillimi apo avancimi i Shqipërisë në NATO dhe në Bashkimin Europian, siç do t’i ndodhë edhe Kosovës”, ka shtuar Thaçi.

Pajtimi parimor në Tiranë ka ngjallur reagime të shumta për shkak të bazës së ndryshme elektorale që kanë pasur dy subjektet kryesore që do të formojnë Qeverinë e re në Tiranë.

Partitë kryesore politike kosovare kanë pasur lidhjet e tyre tradicionale me ato në Shqipëri. Kështu, për shembull, lideri i AAK’së Ramush Haradinaj kishte thënë gjatë muajit të kaluar se priste fitoren e së djathtës shqiptare.

Kryeministri Hashim Thaçi ishte përqafuar me Kryeministrin Sali Berisha kur së bashku kishin inauguruar autostradën që lidhë Tiranën me kufirin e Kosovës. Më vonë gjatë atij muaji, Thaçi kishte pritur në një darkë në qytetin e Prizrenit liderin e Partisë Socialiste Edi Rama.