Interesim i madh për Bajramin

Paraqitjet e shkëlqyeshme të Emir Bajramit me skuadrën e Elfsborgut në kampionatin suedez nuk kanë lënë pa u vërejtur nga ekipe të ndryshme evropiane. Skuadra nga Italia, Gjermania dhe Holanda tashmë kanë shprehur interesim për mesfushorin kosovar.

Ekipi i rikthyer në Seria A Parma është i interesuar që Bajramin gjatë verës ta transferojë në stadiumin Ennio Tardini. Kosovari ka bindur drejtuesit e ekipi Gialloblu, të cilët e vëzhguan atë nga afër në disa ndeshje me Elfsborgun.

Sipas medieve suedeze, përveç ekipit italian, për anëtarin e përfaqësueses U-21 të Suedisë interesim ka shprehur edhe ekipet nga Bundesliga, Hamburg e Borussia Monchengladbach dhe ato holandeze FC Utrecht e Groningen.

Megjithëkëtë, drejtori sportiv i Elfsborgut, Stefan Andreasen mendon se Kampionati evropian, që po mbahet në Suedi, do të jetë vendimtar për të ardhmen e mesfushorit kosovar.

“Mendoj se Kampionatin evropian është vendimtar për të ardhmen. Por, është e kotë të spekulohet. Emiri është lojtar fantastik, i cili po vjen”, theksoi Andreasen për mediat suedeze.

Në anën tjetër Bajrami, i cili aktualisht është i angazhuar me përfaqësuesen U-21 të Suedisë në Evropianin e të rinjve, ndihet mirë që klube të ndryshme kanë shprehur interesim për të.

“Kam thënë edhe më herët se unë luaj ashtu siç di. Jam i kënaqur që më vëzhgojnë dhe kjo më jep inspirim më të madh”, theksoi Bajrami i cili me Elfsborgun ka kontratë deri në fund të vitit 2011.