Reshjet e pandërprera të borës që kanë nisur intensivisht para një jave kanë bllokuar fshatra të tëra anembanë Kosovës. Bora që u duk se pushoi të shtunën në mëngjes, ditën e sotme (e diel) ka rinisur sërish, duke u pamundësuar borëpastruesve futjen e tyre në disa zona të thella malore të vendit, për t’i zhbllokuar nga bora banorët dhe turistët.

Sipas informacioneve nga terreni, reshjet e borës kanë shënuar rekorde në disa zona, si p.sh në disa fshatra të komunës së Kamenicës, trashësia e ortekëve borës ka arritur në 4 metra. Në këtë komunë, rrugët e mbyllura nga bora janë: Hogosht-Lisockë, Shahiq dhe Zhujë. Ndërkaq, në pjesën e Tyxhecit janë të bllokuara, rrugët: Strezoc -Leshtar dhe Gragjenikë, si dhe në regjionin e Desivojcës, Velegllava, Tërstena dhe Shahiqi, për shkak se nuk ka pasur mundësi të depërtohet.

Situatë e ngjashme me trashësi të borës është edhe në disa fshatra të thella malore të komunave të Pejës, Deçanit dhe Gjakovës.

Bora që është duke rënë pa ndërprerë ka vështirësuar qarkullimin rrugor dhe ajror të Kosovës. Disa rrugë lokale janë bllokuar tërësisht nga ngricat dhe bora. Vështirësi të mëdha po paraqiten edhe në pikat kufitare të Kosovës. Qarkullimi për të gjitha automjetet në pikat kufitare në Morinë, në Qafë të Prushit dhe pika kufitare në Kullë, po funksion me vështirësi dhe për disa orë raportohet të ketë pasur ndërprerje. /BotaSot/