Manchester United është pajtuar të shesë Cristiano Ronaldon në Real Madrid për transferim rekord prej 94 milionë eurosh, ka njoftuar të enjten klubi anglez.

“Manchester United ka marrë ofertë rekorde prej 94 milionë eurosh për Cristiano Ronaldon nga Real Madrid”, thuhet në një komunikatë në uebfaqen zyrtarë të klubit me titullin ‘United pranon ofertën e Realit për Ronaldon’.

“Me kërkesë të Cristianos – i cili përsëri ka shprehur dëshirë për largim – dhe pas diskutimeve me përfaqësuesit e futbollistit, United ka vendosur t’i japë leje Real Madridit të bisedojë me futbollistin. Çështja pritet të përmbyllet deri më 30 qershor. Deri atëherë klubi nuk do të bëjë komente tjera”, thuhet në vazhdim të komunikatës.

Real konfirmoi se ka paraqitur ofertë për Ronaldon, por nuk përmendi shumën e saj.

“Klubi shpreson të arrijë marrëveshje me futbollistin në ditët e ardhshme", thuhet në ueb sajtin zyrtar të gjigantit madrilen.

Ronaldo ka qenë objektiv afatgjatë i Real Madridit, ku presidenti i sapozgjedhur Florentino Perez ishte zotuar se do të bëjë “gjithçka të mundshme” për transferimin e 24 vjeçarit në Bernabeu.

Lajmi vjen vetëm disa ditë pas blerjes së plejmejkerit brazilian Leite Kaka nga Milan për 56 milionë funta, që tregon se Real synon të rrëzojë Barcelonën nga froni në La Liga si dhe të luftojë për titull në Ligën e Kampionëve.

Ronaldo, i cili erdhi në Manchester United për 12 milionë funta më 2003, bëri të qartë se kërkon sfidë të re pas triumfit në Ligën e Kampionëve më 2008, por Ferguson udhëtoi drejt Lisbonës dhe bisedoi me të duke e bindur të mbetet në Old Trafford. Mirëpo, Ronaldo i cili ka kontratë me Manchester Unitedin deri më 2012, e zbehu përkrahjen nga tifozët dhe bashkëlojtarët pas dëshirës publike për transferim në Real.

Çarjet e marrëdhënieve me Fergusonin filluan të shfaqen kur Ronaldo reagoi ashpër pas zëvendësimit kundër Manchester Cityt dhe kritikoi taktikën e menaxherit, pas humbjes në finale të Ligës së Kampionëve nga Barcelona.

Ferguson më parë kishte insistuar se “nuk do t’ia shesë as një virus” i pyetur rreth mundësisë së largimit të Ronaldos në Real.

Por, skocezi ka humbur durimin nga dëshira e Ronaldos për kalim në Spanjë dhe më në fund pranoi ta shesë yllin më të çmuar të ekipit.

Borxhet e klubit prej 700 milionë funta po ashtu mund të kenë luajtur rol në vendimin për pranimin e ofertës së Realit.

Ronaldo shënoi 11 gola për Manchester United, përfshirë 42 në sezonin 2007-08 që i solli atij Topin e Artë dhe çmimin e Futbollistit më të mirë në botë nga FIFA.

Ferguson do ta ketë vështirë ta zëvendësojë, por mesfushori i Bayern Munichut, Franck Ribery, ai i Wiganit, Antonio Valencia dhe sulmuesi i Lyonit, Karim Benzema janë përmendur si objektiva të mundshëm.

Paratë e Realit mund t’i shërbejnë Fergusonit për të mbajtur Carlos Tevezin, i cili dukej në prag të largimit nga klubi pasi United refuzoi të paguajë 32 milionë funta për blerjen e kartonit të tij.