Shakhtar Donetsk është fitues i edicionit të fundit të Kupës UEFA, pasi në finale mposhti Werder Bremenin me rezultat 2-1. Braziliani Jadson shënoi golin e fitores në lojën shtesë, pasi ndeshja në kohën e rregullt përfundoi baras 1-1. Shakhtar u bë klubi i parë ukrainas që fitoi trofeun pas ndarjes së Bashkimit Sovjetik më 1991. Nga sezoni i ardhshëm gara do të quhet Europa League.

Braziliani Jadson shënoi golin e fitores në lojën shtesë për t’i siguruar Shakhtar Donetskut fitoren 2-1 kundër Werder Bremen në finalen e Kupës UEFA të mërkurën. Goditja e Jadsonit pas kromimit nga Darijo Srna, shtatë minuta pas fillimit të pjesës së parë të lojës shtesë, mposhti portierin Tim Wiese dhe e bëri Shakhtarin ekipin e parë ukrainas që fiton një titull kryesor evropian nga ndarja e Bashkimit Sovjetik.

Braziliani Luiz Adriano e kishte kaluar Skakhtarin në epërsi, në finalen e tyre të parë evropiane, me gol të bukur në minutën e 35-të në stadiumin Sukru Saracoglu, por bashkëkombësi Naldo barazoi për Werderin para përfundimit të pjesës së parë, pasi portierit Andriy Pyatov i kali topi nëpër duar dhe përfundoi në rrjetë.

Shakhtar impresionoi me lojën me një prekje dhe kërcënoi kohë pas kohe Werderin, ndërsa klubit gjerman i mungonte kreativiteti i mesfushorit brazilain Diego, të suspenduar. Trajneri i Shakhtarit, Mircea Lucescu përfshiu të pesë futbollistët e tij brazilianë në repartin ofensiv dhe ata ishin rreziku kryesor për portën e Wieses.

Mbrojtësi i majtë Razvan Rat shërbeu për Adrianon, i cili pasi hyri në zonën e Werderit arriti të dërgojë topin mbi Wiesen për epërsinë 1-0. Por, edhe pse i mungonte ndërtimi i aksioneve, Werder arriti të barazojë kur portieri Pyatov bëri një gabim të pashpjegueshëm pas goditjes së lirë nga Naldo dhe topi u devijua nga duart e tij dhe përfundoi në rrjetë.

Një pjesë e dytë më pak interesante solli pak raste për shënim. Wiese largoi topin pas goditjes së lirë të Jadson, ndërsa zëvendësuesi i Werderit, Aaron Hunt nuk realizoi pas shërbimit nga Pizarro, 13 minuta pa përfunduar ndeshja. Ndeshja shkoi në lojën shtesë dhe Shakhtar përsëri u mundua të udhëheqë lojën dhe kjo iu shpagua në minutën e 97-të, kur Jadson shënoi golin për rezultatin 2-1 që doli të jetë përfundimtar në triumfin e ekipit të tij.

Shakhtar është klubi i tretë nga ish Bashkimi Sovjetik që fitoi Kupën UEFA në pesë sezonet e fundit, pas triumfeve të CSKA Moskës më 2005 dhe Zenit St Petersburg vitin e kaluar. Kupa UEFA do të quhet Europa League nga sezoni i ardhshëm, garë e rinovuar nëpërmjet së cilës UEFA shpreson të përforcojë imazhin dhe profilin e garës së dytë kryesore të klubeve nga futbolli evropian.