Finalja e edicionit të 57-të Kupës së Shqipërisë midis Tiranës e Flamurtarit u fitua nga skuadra vlonjate, me rezultatin 2-1.

Në stadiumin "Niko Dovana" të Durrësit, Flamurtari arriti të fitonte Kupën e tretë në historinë e tij, pasi e kishte fituar dy herë të tjera në vitet 1985 dhe 1988.

Fitorja e trofeut të dytë më të rëndësishëm në futbollin shqiptar, ka bërë që Flamurtari të jetë skuadra e parë shqiptare, që konfirmon pjesmarrjen e saj sezonin e ardhshëm në Kupat e Europës.

Ndeshja është vendosur vetëm në minutën e fundit të saj, kur sulmuesi i Flamurtarit, Zeqiri shënoi golin e fitores për vlonjatët, teksa kishin shënuar më parë mbrojtësi Dabulla në minutën e 42-të për Tiranën dhe kishte barazuar sulmuesi Devis Mema në minutën e 65-të.

Në tribunën e stadiumit "Niko Dovana" ishin të pranishëm Presidenti i Republikës, Bamir Topi si dhe presidenti i FSHF-së Armando Duka, të cilët i dorëzuan lojtarëve të Flamurtarit trofeun e Kupës së Shqipërisë.

Presidenti i klubit vlonjat, njëkohësisht dhe kryetar i Bashkisë së Vlorës, Shpëtim Gjika, përpara ndeshjes kishte vendosur në dispozicion të lojtarëve për fitimin e trofeut jo pak, por 100 mijë euro.

Në fund të takimt ai u shpreh se: "nuk ka fjalë për të falenderuar këta djem të cilët nderuan sot fanelën e Flamurtarit. Të gjithë lojtarët do të shpërblehen pas kësaj fitoreje të madhe".

"Futbolli prandaj është i bukur, pasi rezultati është enigmë deri në minutën e fundit. Sot i takoi Flamurtarit të fitonte, falë dëshirës që lojtarët e saj treguan në fushën e lojës", u shpeh presidenti FSHF-së, Armando Duka.

Flamurtari arriti kështu të fitonte për herë të parë ndaj Tiranës, me të cilën kishte humbur tre herët e para në finalet e Kupës, duke çuar festë në qytetin bregdetar. Për tifozët ky ishte një trofe që mungonte prej vitesh, ndërsa sipas tyre, "lojtarët do të priten në Vlorë si heronj".

Për sa i përket "Librit të artë" të Kupës së Shqipërisë, skuadra e Partizanit vazhdon të jetë skuadra që e ka fituar më shumë herë këtë trofe, teksa mban rekordin absolut me 15 të tilla. Tirana e ka fituar 13-të herë teksa ka diskutuar në total 22 finale, ndërkohë që Flamurtari ka fituar 3-herë dhe ka dalë 12 herë në finale.

Vllaznia, që fitoi edicionin e kaluar për herë të 6-të Kupën e Shqipërisë, është skuadra e katërt me më shumë trofe pas Partizanit (15), Tiranës (13) e Dinamos (13). Vllaznia nga ana e saj ka humbur 6 finale.

Flamurtari së bashku edhe me Partizanin, janë dy skuadrat që kanë humbur më shumë finale: nga 8-të, të ndjekur nga Tirana me 7-të e Besa e Vllaznia me nga 6-të

Tirana - Flamurtari 1-2
Shënues: Dabulla 42'/ Mema 65', Zeqiri 92'
Finalja e Kupës së Shqipërisë. Edicioni i 57-të
Stadiumi "Niko Dovana", Durrës,

E mërkurë, 6 maj 2009, ora 16:00
TIRANA: Nallbani; Dabulla, Osmani (46' Muzaka), Pezo, Abraham, Agolli, Devolli, Patushi (78' Sefa), Muka (kap.), Xhafa, Memelli. Trajner: Agustin Kola

FLAMURTARI: Moçka; Begaj, Paniç (kap.), Veliu, Kuqi, Strati (54' Shehaj), Beqiri, Zeqiri, Alvizh (70' Brajkoviç), Çaushaj, Mema. Trajner: Eqerem Memushi.
Gjyqtar: Bardhyl Pashaj, Ergin Doda, Denis Rexha. Gjyqtar i katërt: Sokol Rexhaj

1'- Topin e parë e luajti Flamurtari, skuadra që e ka fituar dy herë Kupën e Shqipërisë. Finalja e 11-të që luhet prej skuadrës vlonjate, nga këto 8 të humbura.

4'- Portieri veteran i Tiranës, Blendi Nallbani, reagoi mirë pas një silure të braziliano-kroatit Robert Alvizh nga goditja standarde, duke e devijuar atë në goditje këndi.

14'- Ilirjan Çaushaj u shfaq i vetëm përballë Nallbanit, mesfushori i Flamurtarit hezitoi, e më pas pasoi për Devis Memën, por sulmuesi korçar i vlonjatëve, nuk ndodhej në vendin e duhur. Flamurtari shpërdoroi një mundësi të mirë shënimi.

15'- Devi Muka i shpëtoi bukur mbulimit të Begës në të anën e djathtë të sulmit bardheblu, harkoi në zonë për Memellin, ky i fundit goditi me kokë, në qëndër të portës, por portieri i Shpresave të Shqipërisë, Shpëtim Moçka, reagoi në mënyrë perfekte.
32'- Çaushaj është edhe protagonisti i gjysëmorëshit të parë të takimit. Mesfushori i Flamurtarit shënjestroi shpesh nga larg portën e Nallbanit, por disa nga goditjet e tij ishin jashtë kuadratit dhe të parrezikshme.

33'- Mesfushori bardheblu Saimir Patushi goditi nga rreth 22 metra me të majtën, por Moçka në stërzgjatjen e tij në krahun e djathtë i mohoi golin Tiranës, duke grushtuar topin.

36'- Çaushaj lëshoi një korridor të bukur për Alvizh, braziliano-kroati i ndodhur në të majtë të zonës së rreptësisë, nuk goditi, por preferoi të pasonte, ndërhyri Dabulla, duke e devijuar në goditje këndi.

42' - Dabulla çoi shifrat në 1-0. Kapiteni Devi Muka ekzekutoi një goditje të lirë në afërsi të këndit të flamurit, harkimi ishte i lartë në zonë, dhe aty mbrojtësi 29-vjeçar Rezart Dabulla kërceu fuqishëm mbi Çaushajn, duke shënuar me kokë golin për Tiranën.
54'- Çaushaj dha një top për zëvendësuesin Ardit Shehaj, ky i fundit goditi bukur nga rreth 20 metra, por Nallbani reagoi mirë. Ngacmimi i parë i Flamurtarit në pjesën e dytë.

65' - Zeqiri i shpëtoi mbulimit të Dabullës, më pas shmangu edhe ndërhyrjen e Abrahamit, Nallbani doli nga porta, lojtari i Flamurtarit i dhuroi pasin e artë sulmuesit Devis Mema, dhe ky i fundit i lirë para kuadratatit të portës, bëri punën më të lehtë, duke shënuar golin e barazimit. 1-1. Portreti i presidentit vlonjat Shpëtim Gjika shprehu gëzim të jashtëzakonshëm në tribunën "VIP".
92'- Hair Zeqiri galopoi drejt zonës bardheblu, duke poshtëruar Nallbanin me topin e kaluar mes kemëbve, e vulosur përfundimisht rezultatin 2-1 e fitimin për herë të tretë të Kupës së Shqipërisë nga ana e Flamurtarit.

- Fituesit e Kupës së Shqipërisë:
15 Partizani
13 Tirana
13 Dinamo
6 Vllaznia
3 Teuta
3 Flamurtari
2 Elbasani
1 Apolonia
1 Besa.