Faleminderit” ishte fjala e vetme që ajo e tha në gjuhën shqipe.
Megjithatë, aktorja hollivudiane me prejardhje shqiptare, Eliza Dushku,
është e vendosur të jetë zëri i shqiptarëve nëpër botë. Ky është
premtimi që ka dhënë Dushku, me të mbërritur në Prishtinë. E shoqëruar
nga një ekip i madh, mes të cilëve edhe i dashuri i saj, aktori Rick Fox
e fotografi Fadil Berisha, Dushku, në orët e vona të së shtunës, është
vendosur në hotelin “Victory” në Prishtinë, raporton Koha Ditore.
Kryeqyteti ka qenë pika e fundit e agjendës së saj njëditore, pasi gjatë
ditës ajo ka vizituar Korçën dhe Maqedoninë.

Orët e vona të së shtunës, Dushku, i ka kaluar në klubin e natës “Duplex” në kryeqytet.


E veshur me një bluzë të zezë, pantallona ngjyrë kafeje, Dushku me të
arritur në Kosovë, ka rrëfyer qëllimin e misionit të saj që do ta
finalizojë nga vizitat nëpër vendet shqiptare.


Dushku, e cila gjatë vizitës së fundit në Kosovë, në vitin 2008,
kishte shprehur gatishmërinë të realizojë film me regjisor kosovarë, ka
thënë se nuk ka asgjë konkrete lidhur me këtë.


“Mendoj se filmi për të cilin kemi folur, ka ndodhur diçka dhe nuk ka
asgjë për t’u raportuar ende”, ka thënë Dushku, derisa është fokusuar
më shumë te dokumentari që do të realizojë në bashkëpunim me
produksionet e njohura amerikane.


“Fillimisht do të realizojmë dokumentarin, sepse dëshirojmë t’ia
tregojmë botës eksperiencën tonë në Shqipëri. Jemi duke punuar me një
nga kompanitë më të mëdha në ShBA dhe do t’ua tregojmë njerëzve
Shqipërinë”, ka thënë Dushku, derisa ka shpjeguar se pjesë e
dokumentarit janë vizitat nëpër qytete të ndryshme shqiptare, bisedat me
artistë, takimet me njerëzit, etj. Vizitat e saj në Kosovë gjithashtu
do të jenë pjesë e dokumentarit.


“Ka njerëz që duan të dinë për Shqipërinë dhe unë dua të jem zëri i shqiptarëve”, ka thënë ajo.