Sekretari i Përgjithshëm i LSI-së, Luan Rama i përgjigjet në distancë
zërave nga opozita për një afrim të mundshëm mes dy forcave dikur
aleate dhe sot rivale. Duke komentuar edhe ndryshimet kushtetuese, Rama
shprehet se ofrojnë bashkëpunim për reformën zgjedhore, por jo për
interesat personale të kreut të PS-së.


Pas zgjedhjeve në Tiranë, disa prej eksponentëve
socialiste kanë hedhur idenë e një afrimi të PS-së me LSI-në si rruga
për të sjellë të majtën në pushtet. Cili është qëndrimi juaj ndaj këtyre
zërave?

Në respekt të vëmendjes tuaj, përkatësisht edhe të punës që bëni ndaj
së cilës unë jam i ndjeshëm edhe si koleg, do t’ju ftoja të mos
humbasim shumë kohë me qëndrime të papjekura, spekulative dhe të
improvizuara prej qasjes personale që këta individë kanë me kryetarin e
tyre humbës. E kam thënë dhe gjetiu dhe e përsëris edhe për ju dhe
lexuesit tuaj, që ata që janë shprehur dhe ata që i kanë porositur këta
të shprehen, që ta harrojnë se LSI mund t’i shërbejë Edi Ramës që pasi
humbi Bashkinë e Tiranës të “fitojë” kryeministrinë. Edi Rama duhet të
mbajë përgjegjësi që shkatërroi Partine Socialiste dhe vlerat që ajo
përfaqësonte, që shkatërroi partneritetin me LSI-në dhe që shkatërroi
edhe të majtën duke transplantuar brenda radhëve të saj individë pa
asnjë lidhje me të dhe pa asnjë vlerë. Zëdhënësit e interesave të Edi
Ramës nëse realisht duan të dëshmojnë se e duan PS-në, të flasin më parë
për bashkëpunim brenda strukturave të PS-së, të bashkëpunojnë me
deputetët dhe veprimtarët e të gjitha niveleve e ta sjellin PS-në aty ku
kontribuohet për interesat e vendit.