Kryetari i Bashkisë së Tiranës, Lulzim Basha do të takojë sot
paradite në zyrën e tij aktoren e njohur shqiptare që luan në skenat e
Hollivudit, Eliza Dushku. Ajo mbërriti dje në Shqipëri, në kuadër të një
dokumentari që do të zhvillojë për të promovuar vlerat artistike,
kulturore dhe turistike të Shqipërisë.

Dushku u prit në Aeroportin Ndërkombëtar “Nënë Tereza” në Rinas të
Tiranës nga nënkryetarja e bashkisë së Tiranës, Jorida Tabaku, e cila
theksoi se aktorja ka ardhur për të promovuar vlerat social-kulturore të
Shqipërisë, për të parë disa nga qytetet kryesore për rreth 10 ditë.

Tabaku konfirmoi se, aktorja Eliza Dushku do të takohet këtë të diel
me kryebashkiakun Lulzim Basha si dhe do të vizitojë disa nga qendrat
tregtare të Tiranës e më pas do të ketë një udhëtim turistik në Durrës,
Berat, Korçë, Krujë e Vlorë për të bërë një promovim sa më të mirë të
Shqipërisë.