Në fluturim. Kështu e ka përshkruar kryeministri Berisha Shqipërinë
në vitet e qeverisjes së tij. Në mbledhjen e radhës të Këshillit të
Ministrave, kreu i qeverisë e vuri theksin tek investimet e huaja,
ndërsa vijoi të përmendë sukseset e mëdha të qeverisjes 6-vjeçare, të
cilat tashmë, sipas tij, “mund të krahasohen veçse me vetveten”.

“Një nga premtimet themelore të qeverisë ishte shndërrimi i
Shqipërisë në vendin më tërheqës për investime. Kjo është sot realitet.
Shqipëria është i vetmi vend në rajon me rritje të investimeve të huaja.
Në rast se në vendet e tjera investimet kanë rënë, kjo nuk ka ndodhur
në Shqipëri”, theksoi Berisha, pavarësisht se sipas deklaratës më të
fundit të zv.ministrit të METE-s, Eno Bozdo (që citoi një raport të
PNUD-it) vendin e parë për investimet e huaja në rajon e mban Serbia.

Por kryeministri vijoi se ishin arritur objektivat dhe se që nga koha
kur ai kishte marrë pushtetin, “Shqipëria ka fluturuar”. Duke ironizuar
qeverinë paraardhëse Berisha tha se tashmë ai mund të krahasohej vetëm
me veten.

Ai vuri në dukje se Shqipëria po përjeton një revolucion. Qindra
mijëra vende pune janë krijuar, tha Kryeministri, teksa u shpreh se
investimet e huaja kanë bërë që në Shqipëri të 10- fishohet përdorimi i
internetit. Berisha tha se në 6 vitet e fluturimit të vet, në Shqipëri
janë investuar 4 miliardë dollarë.