Rritet fluksi i bashkatdhetarëve,që kthehen në Shqipëri për pushimet e
verës nga pika doganore e Kapshticës. Çdo ditë nga kjo pikë doganore
regjistrohen mesatarisht deri në 4 mijë persona në hyrje dhe mbi 2.500
persona që udhëtojnë drejt Greqisë apo vendeve të tjera të hapësirës
Shengen. Vetëm gjatë javës së fundit, siç bëjnë me dije drejtuesit e
kufirit dhe migracionit, kanë hyrë nga kjo doganë më tepër se 25 mijë
bashkatdhetarë me 7.500 mjete.



I konsiderueshëm ka qenë edhe numri i të huajve , të cilët vijnë në
Shqipëri për të frekuentuar destinacionet turistike të rajonit të
Korçës, por edhe zonat bregdetare të vendit,ku java që lamë pas shënoi
më tepër se 8 mijë turistë të huaj.

Fluksi i lartë i lëvizjeve në të dyja anët e kufirit, është menaxhuar
më së miri nga ana e policisë kufitare ,duke evituar krijimin e radhëve
dhe orët e pritjes dhe duke lehtësuar lëvizjen ,si në hyrje ashtu edhe
në dalje nga toka shqiptare.

Nga ana e palës shqiptare është punuar me 6 sportele në dalje dhe 4
të tillë në hyrje,ndërsa pala greke ka vënë në dispozicion të daljeve 5
sportele.


Gatishmëria e policive kufitare të të dy vendeve, ka mundësuar
përpunimin e dokumentacionit të qytetarëve dhe mjeteve në pak
minuta,çfarë ka bërë që edhe në orët e pikut, situata në këtë doganë të
jetë normale.


Për sa i përket rritjes së fluksit të lëvizjeve në fundjavë, policitë
kufitare të të dyja vendeve kanë rënë dakord për dyfishimin e numrit të
sporteleve dhe personelit, për të mundësuar lëvizjen normale të
qytetarëve dhe për të shmangur radhët e gjata.