Kombëtarja e Shqipërisë ka pasur fat, pasi nuk do t’i ketë në grup
kombëtaret e forta si bie fjala: Gjermania, Italia, Anglia, Franca,
Holanda. Shqipëria do të jetë në grupin E për eliminatoret e Kampionatit
Botëror që do të mbahet në vitin 2014 në Brazil. Shorti është hedhur
të shtunën në mbrëmje, në Rio de Janeiro të Brazilit për kualifikimet e
botërorit të futbollit “Brazil 2014”. Shqipëria rivalë do të ketë
Norvegjinë, Slloveninë, Zvicrën, Qipron dhe Islandën. Kombëtarja
Shqiptare ka marrë pjesë për herë të parë në eliminatoret e një botërori
në “Angli 1966”, ndeshja e parë e saj ka qenë kundër Holandës (24 maj
1964), të humbur 2:0 në Roterdam. Ndërkaq, ballafaqimi i fundit i saj në
kuadër të botërorit është me Suedinë në Rasunda pikërisht me 14 tetor
2009, kur humbën me rezultat 4:1. Kuqezinjtë kanë zhvilluar 84 ndeshje
në eliminatoret e kampionateve botërore, duke fituar 11 ndeshje,
barazuar 11 dhe humbur 62 takime. Ballafaqimet kualifikuese do të
zhvillohen nga 7 shtator 2012 deri më 15 tetor 2013. Skuadrat do të
luajnë në 8 grupe me nga 6 skuadra dhe një grup me nga 5 ekipe.
Kontinenti i Evropës do të përfaqësohet në “Brazil 2014” me 13
finalistë.