Zëvendëskryeministri dhe ministri i Punëve të Jashtme të Shqipërisë,
Edmond Haxhinasto në një takim me ambasadoren e Egjiptit në Tiranë,
Amina Imam Gomaa, i ka shprehur pritshmërinë e Shqipërisë për njohjen e
Republikës së Kosovës nga Egjipti, si kontribut i drejtpërdrejtë për
paqen dhe sigurinë e Ballkanit.


Takimi kishte në fokus zhvillimet politike në Egjipt dhe në gjithë
rajonin e Magrebit. Në këtë kuadër, ministri Haxhinasto shprehu
mbështetjen dhe gatishmërinë e Shqipërisë për të dhënë kontributin tonë
në proceset e tranzicionit në këto vende.


Duke folur për zhvillimet në Lindjen e Mesme dhe procesin e paqes
atje, ministri Haxhinasto theksoi se Shqipëria ka mbështetur gjithnjë
aspiratat e popullit palestinez për të pasur shtetin e tyre dhe ky ka
qenë një qëndrim parimor, për krijimin e dy shteteve që jetojnë në paqe
dhe siguri pranë njëri tjetrit.