Zv./ministrja ka vendosur të japë dorëheqjen, për të vazhduar të jetë krahu i djathtë i kryebashkiakut, ashtu si gjatë fushatës

Ka qenë “krahu i djathtë” i Bashës gjatë gjithë fushatës e nuk ka sesi të mos e ndjekë as në detyrën e re. Zëvendësministrja e Integrimit, Jorida Tabaku dha sot dorëheqjen nga posti që mbante në këtë ministri. Largimi i saj konfirmohet nga burime të Ministrisë së Integrimit. Ndërkohë që dorëheqjen si zv/ministre duket se lidhet me një kalim të saj në Bashkinë e kryeqytetit, pasi vjen vetëm një ditë pas betimit të kreut të ri, Lulzim Basha, si dhe konstituimit të Këshillit bashkiak të Tiranës, ku ajo është anëtare. E megjithëse ende s’ka asgjë konkrete flitet se Tabaku është një kandidate e mundshme për numrin dy të bashkisë kryeqytetase, në krah të Bashës.

Pas emërimit të Lulzim Bashës në bashkinë e Tiranës, Jorida Tabaku ka qenë kandidate për njërin nga dy funksionet e nënkryetarit, poste të mbetura bosh, pasi dy njerëzit që ishin më parë dhe drejtuan bashkinë me Edi Ramën dhanë dorëheqjen përpara rotacionit. Tashmë që Tabaku duket e destinuar për në institucionin më kryesor në rang qytetesh, mbetet vakant vendi i zv./ministres së Integrimit, që shihet si një nga ministritë më kryesore, duke pasur parasyshim qëllimin për integrimin sa më të shpejtë në BE.