Vërtet ka një numër të madh të mediave: nga radiot e televizionet, deri te gazetat e shtypura dhe "online"

Në Shqipëri, vendin evropian me numrin më të madh të gazetave për banorë, tirazhi i të përditshmeve nuk kalon 20 mijë kopjet dhe gazetarët shfaqin hapur autocensurën e praktikojnë një mënyrë sipërfaqësore për të bërë informacion. Kjo është panorama që bën Lufti Dervishi, ekspert mediash dhe drejtori ekzekutiv i “Transparency International Albania”, i cili tregon se ka ‘media private më shumë sesa media të lira dhe pronarët i mbajnë shtrënguar si një kapital publik për të mbajtur, apo rritur influencën e grupeve të caktuara politike, apo ekonomike të vendit. Sipërmarrësit bëjnë gjithçka për të mos lënë këto media të dështojnë, përkundër ecurisë së tyre aspak të mirë në treg”.

Mes shkaqeve të kësaj gjendjeje, sipas Dervishit, në vend të parë qëndron “feticizimi i teknologjisë: të gjithë investojnë në media, përderissa është prestigj në vend të investohet në sipërmarrje me teknologji të lartë, megjithatë askush s’investon mbi gazetarët dhe përgatitjen e tyre profesionale: asnjë freskim, asnjë kurs formimi. Kështu që kemi mediat që shpesh përfaqësojnë investime të mëdha, sidomos përsa i takon teknologjive, por nuk kemi të njëjtën cilësi informacioni dhe thellimi gazetaresk”. Lulëzimi i gazetave në numër, sipas asaj që vëren Dervishi, vjen “pjesërisht nga fakti që mediat e lira kanë qenë një 'mollë e ndaluar' deri në vitin 1991. Pas rënies së komunizmit, gazetat, radiot dhe televizionet private janë shumëfishuar nga dita në ditë. E çuditërisht, megjithëse tregu shqiptar është shumë i vogël, duke pasur parasysh që bëhet fjalë për një vend me rreth 3 milionë banorë, pjesa më e madhe e mediave ka vazhduar të ekzistojë edhe pas fazës së entuziasmit të parë pluralist në vend”. Po si arrijnë të mbijetojnë? “Pjesa më e madhe e këtyre mediave përfaqësojnë investimin e vetëm të sipërmarrësve, që i zotërojnë. Shpesh, objektivi është që t’i mbajnë si një kapital publik dhe si mjet i komunikimit publik, për të mbajtur, apo rritur influencën e grupeve të caktuar politikë dhe ekonomikë në vend. Bëhet gjithçka për të mos i lënë të dështojnë këto media, megjithëse mund të mos kenë sukses në treg”. Situata është e tillë sa që nuk mund të flitet për “media të lira” në Shqipëri. “Ka më shumë media private, sesa media të lira. Zakonisht, për t’i kontrolluar më mirë, merren në punë fare pak gazetarë. Detyra e gazetarit konsiston në mbushjen e faqeve. Nuk është e lehtë të bëhet gazetari e vërtetë. Duhet kohë dhe para. Megjithatë mund të them se cilësia është e fundit në radhë nga shqetësimet”. Ikub