Portieri i Novarës premton më të mirën: Kombëtarja, maksimumi im i mundshëm
Dje janë shuar dyshimet në lidhje me titullarin e portës për
Bjellorusinë. Nga minuta e parë do të luajë Samir Ujkani. Në fillim,
“ekstremi” i Novarës ka dashur të tregojë modestin, duke e “fshehur”
faktin që ai do të jetë titullar:
“Po edhe jo. Unë jam këtu për të bërë punën time.” Por më pas ka dalë
zbuluar, duke pranuar se trajneri Kuzhe tashmë ia ka konfirmuar këtë
rol. “Unë jam këtu për të bërë më të mirën time. Jam gati për të luajtur
titullar, edhe pse nuk është në dorën time gjithçka. Trajneri më ka
besuar dhe më ka thënë se do të jem titullar ndaj Bjellorusisë,”- është
shprehur Ujkani.
Presioni në kombëtare
23-vjeçari shqiptar konsiderohet portieri më i mirë në Serinë B.
Ndoshta në sezonin e ardhshëm mund të kthehet te Palermo, në Serinë A.
“Aktivizimi në Itali, në Serinë B, dhe në kombëtare janë dy gjëra të
ndryshme. Kur vjen në ekipin komëbtar e kupton që niveli është më i
lartë. Është maksimumi i maksimumit.
Përballë kemi ekipe dhe lojtarë shumë të fortë. Në takimet ku jam
aktivizuar deri tani nuk është se gjërat kanë shkuar për mrekulli. Një
gabim i vogël në kombëtare mund të të kushtojë shumë, ndërsa në ndeshjet
e kampionatit s’është gjë.”
Komunikimi me mbrojtësit
Të jesh titullar i kombëtares nuk do të thotë të kesh aftësi edhe në
organizimin e lojës mbrojtëse. Komunikimi mes portierit dhe mbrojtësve
është shumë i rëndësishëm në futboll, sidomos në nivel kombëtaresh:
“Qëllimi im është të jap maksimumin në ekipin kombëtar.
Sa i përket Bjellorusisë, mund të them se duhet të jem i përqendruar
95 minuta. Kundërshtarët vërtet mund të mos kenë shumë raste për shënim,
por ama në ato pak raste të ndëshkojnë. Duhet të mbrohemi mirë edhe të
arrijmë të shënojmë. Kam afër edhe Lorikun.
Ai luan shumë mirë dhe është një nga lojtarët bazë të ekipit. Edhe me
lojtarët e tjerë jemi shumë të lidhur, në fushë dhe jashtë saj. Kjo
është edhe forca jonë. Shpirti i grupit dhe lidhja edhe jashtë fushe me
të vërtetë të bën edhe më të fortë.”
Beqaj, shumë më tepër se koleg
“Beqaj po më ndihmon jashtëzakonisht shumë. Është një person që më ka
ndenjur shumë afër. Më merr shpesh në telefonon dhe më pyet për ecurinë
time në Itali. Kjo është diçka fantastike. Vetëm muajin e fundit më ka
marrë 5 6 herë në telefon.
Mbështetja morale ka shumë rëndësi për mua. Edhe gjatë kësaj jave më
ka qëndruar pranë. Shpresoj që të vazhdoj kështu, edhe pse shumë
portierë të rinj po dalin dita-ditës. Për momentin jam shumë i kënaqur
me të tashmen.”