Japonia është goditur nga një tërmet i tmerrshëm që ka shkaktuar një tsunam disa metra të lartë i cili ka përfshirë bregdetin verilindor.

(I plotësuar)-Mund të jenë më shumë se 1 mijë viktimat e tërmetit të dhunshëm dhe tsunamit që sot goditën Japoninë.

Lajmin e ka bërë të ditur agjencia zyrtare japoneze e lajmeve, Kyodo.

Ndërkohë Ministria e Mbrojtjes ka njoftuar se nga të dhënat paraprake, janë shkatërruar 1800 shtëpi në prefekturën e Fukushimës.

Banka Botërore është shprehur e gatshme të ndihmojë qeverinë dhe popullin japonez.

* * * * *

Mediat japoneze: 300 kufoma vetëm në plazhin Sendai

Siç bëjnë të ditur mediat japoneze numri i viktimave nga tërmeti që ka goditur sot në mëngjes (sipas kohës tonë) vazhdon të rritet prej çastit në çast dhe se deri më tash janë konfirmua më shumë se 300 kufoma.

Por nga pamjet qe emetojnë mediat botërore pritet që numri i viktimave do të jetë shumëfish më i madh.

* * * * * *

Shifrat e reja të autoriteteve japoneze flasin për të paktën 60 të vrarë dhe qindra të zhdukur nga tërmeti me magnitudë 8.9, që ka goditur bregun verilindor të Japonisë.

Valët e cunamit që ka pasuar, kanë shkatërruar qindra shtëpi. Disa stacione atomike të rrymës janë shkyçur automatikisht, ndërsa zyrtarët thanë se nuk ka pasur rrjedhje radioaktive.

Aeroporti Narita në Tokio ka rifilluar pjesërisht fluturimet pas mbylljes së përkohshme.