Dy ushtarë amerikanë u vranë nga një kosovar me emri Arif Uka nga Veriu i Mitrovicës, i cili sulmoi autobusin që po transportonte ushtarakët, në parkingun e aeroportit të Frankuftit.

(I plotësuar) - Qeveria e Kosovës dënon vrasjen në Aeroportin e Frankfurtit

Qeveria e Republikës së Kosovës është jashtëzakonisht e prekur rëndë dhe dënon ashpër vrasjen e dy qytetarëve amerikanë dhe plagosjen e dy të tjerëve nga një qytetar me prejardhje nga Kosova, që ndodhi sot në Gjermani.

Qeveria e Republikës së Kosovës i shpreh ngushëllimet më të thella popullit amerikan, qeverisë së Shteteve të Bashkuara të Amerikës, ushtrisë amerikane dhe familjarëve të viktimave.

Ky rast makabër është nje akt individual kundër vlerave civilizuese dhe kundër traditës së popullit të Kosovës, që gjithmonë dhe përjetësisht do të jenë mirënjohës Shteteve të Bashkuara të Amerikës, popullit amerikan dhe qeverisë së SHBA-ve për mbështetjen e fuqishme që i kanë dhënë popullit të Kosovës gjatë procesit të lirisë, pavarësisë dhe tani zhvillimit dhe integrimit të Kosovës.

Qeveria dhe gjithë populli i Kosovës në këto momente të rënda solidarizohen me dhimbjen dhe qëndrojnë pranë qeverisë amerikane, popullit amerikan, ushtrisë amerikane dhe familjeve të viktimave.

Qeveria e Republikës së Kosovës shpreh besimin dhe bindjen e plotë që aktorët e këtij akti monstruoz do të dalin para drejtësisë dhe do të marrin dënimin e merituar.

"Kjo është një ngjarje tragjike, është tronditëse" tha Bajram Rexhepi

Vrasja e dy ushtarëve amerikanë ka shqetësuar jo vetëm opinionin publik në Kosovë por edhe institucionet e Kosovës. Megjithëse deri më tash nuk ka ndonjë deklaratë zyrtare nga institucionet Kosovës, identifikimi i vrasësit me emrin Arif Uka, banor i pjesës veriore të Kosovës e ka shtuar edhe më shumë pezmin dhe shqetësimin e popullit shqiptar të Kosovës.

"Kjo është një ngjarje tragjike, është tronditëse" tha Bajram Rexhepi, ministër i Brendshëm i Republikës së Kosovës.

Ne jemi duke u përpjekur që të dijmë më tepër për këtë ngjarje, dhe se a ishte një krim i organizuar apo i cilës natyre është ky sulm” shtoi Bajram Rexhepi në një deklaratë për gazetë “The Indepedent”.

Kancelarja gjermane, Angela Merkel, ka dënuar sulmin duke e cilësuar si "ngjarje të tmerrshme". Ajo ka shtuar se vendi i saj do të bëjë “gjithçka që është e mundur” për të hetuar deri në fund sulmin ndaj autobusit të ushtarëve amerikanë.

Ushtria amerikane ka një numër bazash në rajonin e Frankfurtit.

***********

Sipas asaj që shkruan “Die Welt”, duke iu referuar burimeve policore, besohet se 21-vjeçari ishte një fondamentalist islamik. Dy ushtarë të tjerë amerikanë janë plagosur rëndë dhe nuk dihet nëse do t’i mbijetojnë plagëve.

Autori i krimit u arrestua në vendngjarje nga policia. Ai kishte kërkuar më parë azil në shtetin gjerman.

Sipas policisë, nuk dihet saktë se cilat ishin motivet e krimit, por natyra e sulmit forcon pistën e një sulmi terrorist. Aktualisht, forcat e rendit në Frankfurt po hetojnë mbi mundësinë e lidhjeve të 21-vjeçarit me persona të tjerë.

Sekuenca ekzakte e ngjarjeve nuk është e qartë, por dihet se kosovari ishte në zotërimin e një pistolete dhe shkëmbeu një debat me stafin ushtarak të autobuzit, përpara se të hapte zjarr.

Ngjarja ndodhi në orën 15:20, në një zonë publike në hyrje të aeroportit të Frankfurtit, e rezervuar për vendqëndrimin e autobuzëve.

Ministri i Brendshëm i Gjermanisë Boris Hessen Rhein (38, CDU) ka dalë në vendin e ngjarjes. Rhein foli për një "akt të tmerrshme dhe shokuese."

I pyetur se është kjo një vrasje me motive terroriste, Ministri Rhein u përgjigj:

Nuk mund të them tash se a ka pasur një sfond terrorist kjo vrasje.