Në Skenderaj sot është shënuar 61 vjetori i lindjes së heroit Hamëz
Jashari dhe 41vjetori i punës së gjimnazit, i cili me krenari mban emrin
e tij. Shënimi simbolik dhe modest i këtyre dy datave të rëndësishme ka
filluar me vënien e kurorave me lule pranë bustit të heroit, në oborrin
e Gjimnazit, dhe mbi varrin e tij në Prekaz.

Ramiz Thaçi, drejtor, duke folur para të pranishmëve të tubuar, pasi
ka përkujtuar sakrificën e të rënëve për liri, në mesin e të cilëve
ishin edhe 10 gjimnazistë të këtushëm, ka thënë se nga ky institucion
kanë dalë personalitete të shquara të fushave të ndryshme
ushtarake, shkencore, politike, ekonomike, etj. prej të cilëve ka veçuar heronjtë Adem e Hamëz Jashari, Ilaz Kodra etj.

Nxënësit e Gjimnazit “Hamëz Jashari” kanë shfaqur një program
artistik me recitale dhe pika muzikore dhe kanë organizuar një ekspozitë
me piktura dhe grafika.