Pronarit të një lokali në Pragë i lindi një ide jonormale, por shumë e suksesshme për të tërhequr klientët. Ua la mysafirëve të caktojnë vetë çmimet e pijeve dhe ushqimit.

“Nuk kisha klientë dhe nuk mundja të tërhiqja kliente të rinj, fillova të mendoj për diçka më interesante. Tani lokali është plotë çdo ditë”, thotë Ondrej Lebovski (42 vjeç), pronar i kafeterisë “Big Lebowski”, shkruajne mediat çeke.

Klientët e këtij lokali caktojnë vetë çmimet e ushqimit, bile edhe të suvenireve, posterave, librave, lodrave dhe kutive të shahut që shiten aty.

Lebovski e ka futur në përdorim këtë “menu” prej muajit gusht. Prej asaj kohe nuk ka probleme me myshterinjtë dhe as që po mendon ta mbyllë lokalin. “Mysafirët po përpiqen të jenë korrekt, disa lënë më shumë e disa më pak para”, thotë Lebovski, i cili ofron edhe koktejin “Rusi i Bardhë”, pijen e preferuar të heroit të filmit Big Lebowski, i luajtur nga Jeff Bridges.