Presidenti i Republikës së Shqipërisë, Bamir Topi, pritet që nesër t’i dekretojë ministrat e rinj të kabinetit qeveritar të udhëhequr nga kryeministri Sali Berisha. Shkak për këtë vonesë dyditore në shpalljen e dekreteve mësohet se është bërë fakti se kalimi i tyre në Presidencë është bërë përgjatë fundjavës, ditë në të cilat protokolli i këtij institucioni nuk punon.
Po kështu mësohet se Presidenti Topi nuk do të ketë asnjë hezitim në firmosjen e emrave të rinj të kabinetit të dërguar në Presidencë nga ana e Kryeministrit Berisha. Nga ana tjetër, me dekretimin e këtyre emrave të rinj nesër, ditën e enjte pritet të bëhet edhe votimi i tyre në Parlament, gjatë seancës parlamentare të parë për këtë vit.
Ajo që pritet në këtë seancë lidhet me faktin se opozita nuk do t’i pranojë këta emra dhe për pasojë pritet të mos marrë pjesë në votimin e tyre. Ishte Kryeministri Berisha, i cili pas vendimit për dorëheqje të parevokueshme nga ana e numrit dy të qeverisë, Ilir Meta, i dorëzoi Presidentit Topi propozimet për zëvendësimin e Metës me Edmond Haxhinaston në pozicionin e tij si zëvendëskryeministër dhe po kështu zëvendësimin me Nasip Naçon në postin e Metës si ministër i Ekonomisë dhe Energjetikës.
Ky ndryshim i papritur në qeverinë Berisha erdhi si rezultat i publikimit të një video-skandali në emisionin investigativ “Fiks Fare”, ku shfaqet një bisedë mes ish-ministrit të Ekonomisë dhe Energjetikës, Dritan Prifti, dhe kryetarit të Lëvizjes Socialiste për Integrim, Ilir Meta, duke folur për pazare ekonomike përmes favoreve që do u bëheshin palëve të treta.