Para 12 vjetësh forcat policore dhe ushtarake kriminale serbe nxorën me forcë njerëzit nga shtëpitë e tyre dhe masakruan 42 civilë shqiptarë, në mesin e tyre fëmijë, gra e të moshuar.
Dymbëdhjetë vite pas masakrës së Reçakut, qytetarët e kësaj ane ende kujtojnë në hollësi këtë ngjarje tronditëse, e cila alarmoi botën për tmerrin dhe gjenocidin që po ushtrohej ndaj popullatës civile shqiptare dhe njëherësh shënoi një kthesë historike për Kosovën.
Më 15 janar të vitit 1999 forcat ushtarakë e policore serbe, vranë e masakruan 42 banorë të fshatit Reçak të komunës së Shtimes.
Të gjithë të pa armatosur, ku në mesin e të vrarëve pati edhe gra, fëmijë dhe pleq. Përveç masakrimit të civilëve, në mbrojtje të viktimave kanë rënë heroikisht edhe 11 ushtarë të Ushtrisë Çlirimtare të Kosovës (UÇK), dhe tashmë ata të cilët fati i shpëtoi nga tmerri i asaj dite, këtë ngjarje sa e kujtojnë me pikëllim, aq edhe krenari.