Kryetari i AKR-së, Behgjet Pacolli, ka bërë të ditur se Guinea Bisau është shteti i 74-të që ka njohur shtetin e Kosovës. Zyrtarë të Ministrisë së Punëve të Jashtme të Kosovës kanë thënë për Kosovapress se në këtë ministri deri në ora 16.00 nuk ka ardhur kurrfarë konfirmimi për njohje të Kosovës nga ana e Guinea Bisau.
Në një konferencë për media ai ka prezantuar tekstin për njohjen e shtetit të Kosovës, e cila është dërguar nga presidenti i Guinea Bisau, Malam Sana.
"Kemi nderin t'u prezantojmë njohjen e 74 në radhë të Republikës së Kosovës të ardhur nga Republika e Guinea-Bisau. Kjo njohje e sjell në 30 për qind numrin e njohjeve që i kanë ardhur Kosovës si rezultat i aktivitetit tim lotues", ka thënë Pacolli.
Guinea-Bisau gjendet në Afrikën Perëndimore dhe kufizohet nga Senegali në veri, në jug dhe lindje nga Guinea dhe në perëndim nga Oqeani Atlantik. Ky shtet ka sipërfaqe prej 36.000 kilometra katrorë dhe një popullsi prej 1.6 milionë banorë.