Në Prishtinë dhe në qytete të tjera të Kosovës, ndërrimi i motmoteve është pritur nëpër sheshe, në restortante, nëpër shtëpi e në ambiente të tjera. Me gjithë motin e ftohtë në rrugët e Prishtinës, kishin dalur shumë qytetarë për ta pritur Vitin e Ri 2011. Mbretëronte një atmosferë gëzimi.

Sikurse vitet tjera edhe kësaj radhe qytetarë të shumtë nga kryeqyteti kanë pritur ndërrimin e motmoteve nën qiellin e hapur në Sheshin “Nëna Terezë”, me ç’rast Komuna e Prishtinës ka organizuar program festiv, i cili ka vazhduar deri rreth orës 1 pas mesnate.

Qytetarët janë shprehur optimistë se 2011-ta do të jetë vit i ndryshimeve.

Kryetari i Komunës së Prishtinës, Isa Mustafa ka zgjedhur që 20 minuta para ndërrimit të moteve t’i urojë qytetarët e Prishtinës, me dëshira që viti 2011 të jetë viti i realizimit të dëshirave dhe i sukseseve.

Me krismat e fishekzjarrëve, edhe qytetarët e Prizrenit e kanë pritur natën më të gjatë të vitit. Pak minuta para ndërrimit të moteve, prizrenasit janë mbledhur në Shatërvan për të festuar Vitin e Ri 2011, duke uruar për një vit me mirëqenie më të mirë se sa ai i kaluari. Ndërkohë 16 incidente janë shënuar si pasojë e mjeteve piroteknike.

Qytetarët e Gjilanit kanë festuar natën më të gjatë të vitit me krisma të fishekzjarrëve. Nga ana tjetër, nuk ka munguar as intervenimi i zjarrfikësve në disa raste, si pasojë e mjeteve piroteknike. Megjithatë disa minuta para se akrepat të shënonin 00, qytetarët janë mbledhur para Teatrit të Qytetit në qendër të Gjilanit për të festuar Vitin e Ri 2010. Nuk ka munguar as koncerti.

Qytetarët festuan me fishekzjarre, këngë dhe hare. Por, raportohet se shumë banorë të Kosovës, Vitin e Ri, 2011, e kanë pritur nëpër ambiente familjare.

Në repartin e gjinekologjisë në Qendrën Klinike dhe Universitare të Kosovës erdhi në jetë fëmija i parë i Vitit të Ri 2011. Ai është një djalë, i cili u lind vetëm 5 minuta pas ndërrimit të motmoteve nga Zejnepe Selmani, banore e Ferizajt.

Ky fëmijë ka lindur shëndosh e mirë, ndërsa emri i tij është Omer Selmani.