Kryeministri i Republikës së Shqipërisë, Sali Berisha siguroi dje nga Kuvendi i Shqipërisë se zgjedhjet lokale të caktuara në maj të vitit 2011 do të zhvillohen dhe ato do të jenë të lira dhe të ndershme.

Duke reaguar ndaj deklaratave të deputetëve socialistë se "po përpiqet të manipulojë proceset e ardhshme elektorale", Berisha u shpreh se "zgjedhjet do të bëhen dhe garantoj shqiptarët se do të jenë të lira dhe të ndershme".

"Nëse ju doni të merrni pjesë jeni të mirëseardhur, doni të bojkotoni, bojkotoni. Keni vërejtje për kodin zgjedhor, sillni amendamentet. Në të kundër vazhdoni programin sipas kërkesave të kryetarit tuaj", tha Berisha duke iu drejtuar deputetëve socialistë.