Akuzat e hedhura nga Zamir Mata, në adresë të nënës së Bleonës, kanë vënë menjëherë në lëvizje prokurorinë dhe policinë. Një ditë pasi Zamir Mata, përmendi disa telefonata të bëra nga nëna e Bleona Matës, një grup hetimor i Drejtorisë së Përgjithshme të Policisë së Shtetit, ka shkuar nga Tirana në Kukës. Hetuesit kanë kontaktuar me Zamir Matën, të cilin e kanë rimarrë në pyetje, në lidhje me ngjarjen dhe me akuzat e fundit të bëra prej tij. Hetuesit kanë kërkuar nga Zamir Mata, sqarime të mëtejshme për faktet që ai ka nxjerrë në dritë së fundi, kur tha se ditën që është zhdukur Bleona, bashkëshortja e tij është larguar disa orë nga banesa, me sqarimin që po shkonte për të punuar tokën. Pas kësaj, sipas Zamir Matës, gruaja e tij nuk ka punuar asgjë në arë. “Atë ditë ime shoqe ka folur mbi gjashtë orë në telefon, unë nuk e di se me kë ka folur”, ka thënë Zamir Mata. Ndërkohë Policia e Shtetit dhe Prokuroria, janë vënë në lëvizje menjëherë pas këtyre deklaratave. Kështu, listës së personave të cilëve u janë verifikuar tablatet telefonike, i është shtuar edhe nëna e Bleona Matës, shtetasja Bukurie Mata. Kjo e fundit është akuzuar nga bashkëshorti, se veç bisedave që ka bërë për gjashtë orë, ajo ka fshehur edhe kartat e numrave të telefonit, që ka përdorur për realizimin e bisedave në fjalë. Pasi ka akuzuar publikisht gruan e tij, Zamir Mata, është shprehur se i bën thirrje asaj që të tregojë ku është vajza. Babai i vogëlushes së zhdukur, ka shprehur dyshimin se gruaja e tij, mund të jetë kërcënuar të mos flasë dhe të mos tregojë çfarë ka ndodhur me vajzën.

Dosja e Bleona Matës, thuajse ishte arkivuar në polici dhe në Prokurorinë e Krimeve të Rënda, në kohën kur Zamir Mata, deklaroi publikisht faktet e panjohura më parë në hetimet mbi zhdukjen e vogëlushes Bleona Mata. Pasi janë njohur me këto fakte, hetuesit kanë nisur menjëherë verifikimet. Kështu, prokuroria po verifikon tablatet e bisedave të kryera me numrat që ka pasur në përdorim Bleona Mata. Qëllimi kryesor i këtij hetimi është verifikimi nëse Bukurie Mata, ka zhvilluar biseda telefonike ditën e zhdukjes së vajzës së saj dhe më pas, kush janë personat me të cilët ajo ka folur. Deri më tani, prokuroria kishte verifikuar tablatet telefonike të vajzave, të afërme të Bleona Matës, të cilat ndodheshin bashkë me 6-vjeçaren në momentin që ajo u zhduk, në maj të këtij viti. Burime të hetimit, thonë se edhe më parë ishin bërë disa verifikime për nënën e të zhdukurës, por hetimi nuk kishte përfshirë të dhënat dhe akuzat e bëra publike nga Zamir Mata. Krahas verifikimit të tablateve të bisedave telefonike, policia dhe prokuroria kanë rimarrë në pyetje babain e Bleonës. Atij i është kërkuar të japë sqarime të sakta për largimin nga banesa të gruas së tij, pas zhdukjes së Bleona Matës. Në dëshminë e tij, policia tha se Zamir Mata, ka nisur të dyshojë pasi kishte shkuar në arë dhe kishte parë që nuk ishte kryer asnjë punim shtesë edhe pse e shoqja ishte larguar për disa orë, duke i thënë se po shkonte të punonte. Në lidhje me telefonatat që ka përmendur në deklaratën e tij, sipas hetuesve Zamir Mata, nuk ka paraqitur ndonjë fakt konkret, por ka thënë se ka marrë dijeni nga banorë të fshatit e madje edhe nga njerëz të afërt me familjen e tij. Dëshmia në lidhje me këto fakte është marrë së fundi nga Zamir Mata, në policinë e Kukësit, ku babai i vajzës së zhdukur është thirrur për të dhënë shpjegime. Atij i është kërkuar të paraqitet në polici, pas akuzave që bëri ndaj bashkëshortes për “veprime të dyshimta”, më 22 maj 2010, ditën kur Bleona Mata, humbi gjurmët ndërsa ndodhej në kullotën e bagëtive, së bashku me disa vajza të afërme të familjes së saj.