a është e arsyeshme kërkesa e Isa Mustafës për zgjedhje të reja në shtator dhe a ia vlen që të shpenzohen dhe 7 milion euro të tjera për zgjedhje të reja?

Etja për pushtet nuk i pengon liderët tanë politikë që çdo vit të mbajnë zgjedhje në Kosovë, vetëm e vetëm që ata të vijnë në pushtet. Ende pa përfunduar procesi zgjedhor i zgjedhjeve të 12 dhjetorit, pas shumë parregullsive teknike dhe vjedhjeve të votave, që shtynë KQZ-në të marrë vendim për rivotim të sërishëm në disa komuna, kanë filluar përfoljet për mbajtjen e zgjedhjeve nacionale në shtator të vitit të ardhshëm. Një kërkesë kjo e arsyeshme, apo absurd i kohës, mund të cilësohej nga shumëkush, e sidomos nga vetë elektorati i cili gjithmonë është ‘viktimë’ e lojërave të ‘ndyta’ të politikanëve tanë.

Deklarata e kryetarit Mustafa, sipas të cilit kjo është rruga e vetme për të pasur institucione legjitime në Kosovë, vjen si rezultat i manipulimit që është bërë me votën e lirë të qytetarëve nga subjektet politike. E deri në atë kohë z. Mustafa ka gjetur edhe formulën me të cilën do të funksiononin institucionet, krijimin e një qeverie teknike, apo gjithëpërfshirëse. Një kërkesë e kryetarit të LDK-së, Isa Mustafa që sërish në shtator të vit të ardhshëm të mbahen zgjedhje nacionalen, ka nxitur reagime të spektri politik në Kosovë. Kjo jo vetëm për faktin se mbajtja e zgjedhjeve në shtator do të ishte një maltretim për qytetarët, sa edhe për faktin se organizimi edhe i një parë zgjedhjeve në Kosovë do t’i kushtonte miliona euro buxhetit edhe ashtu të varfër të Kosovës.

Vetëm për mbajtjen e zgjedhjeve të sivjetme janë ndarë hiq më pak se 7 milionë euro, pa përfshirë këtu mbajtjen e zgjedhjeve për kryetar komune në Rahovec dhe rivotimin që pritet të mbahet në janar të vitit të ardhshme.